Cefnogi disgyblion sydd â phrofiad o fod mewn gofal a disgyblion sydd wedi’u mabwysiadu’n ddiweddar
Mae’r gefnogaeth a roddir gan yr ysgol i ddisgyblion sy’n agored i niwed yn eithriadol. Mae gan arweinwyr ddealltwriaeth ddofn o effaith trawma ac maent yn mabwysiadu ymagwedd dosturiol at gefnogi disgyblion ag anghenion cymhleth. Maent yn meithrin perthnasoedd gwaith gwerthfawr ag asiantaethau allanol i gefnogi’r rhai sy’n profi gorbryder neu heriau ymddygiadol. Mae ffocws craff a strategol ar y ddarpariaeth ar gyfer disgyblion sydd â phrofiad o fod mewn gofal a’r rhai sydd wedi’u mabwysiadu’n ddiweddar, ynghyd â’u teuluoedd a’u gofalwyr, yn galluogi’r ysgol i ennyn diddordeb disgyblion yn eu dysgu tra’n blaenoriaethu eu diogelwch a’u lles. Yn yr ysgol hon, mae staff a llywodraethwyr yn cynllunio cwricwlwm o amgylch anghenion disgyblion sy’n agored i niwed ac yn eu cefnogi i wella a dysgu ar yr un pryd.