Cyfoethogi’r cwricwlwm trwy ddysgu rheolaidd yn yr awyr agored ac yn y gymuned
Mae Ysgol Branas yn darparu cwricwlwm cyfoethogi difyr sy’n ymestyn dysgu y tu hwnt i’r ystafell ddosbarth. Mae disgyblion yn cael gwersi addysg gorfforol yn rheolaidd mewn canolfan hamdden leol ac yn cymryd rhan mewn ystod eang o weithgareddau dysgu awyr agored, gan gynnwys dringo, caiacio a dringo trwy holltau cul. Maent hefyd yn cymryd rhan mewn ymweliadau addysgol ag amgueddfeydd ac adeiladau hanesyddol i gefnogi eu dysgu ym meysydd y dyniaethau, ac yn defnyddio’r gymuned ehangach ar gyfer gweithgareddau ystyrlon a phwrpasol sy’n gwella eu lles ac yn datblygu medrau bywyd. Mae’r ysgol yn mabwysiadu dull hyblyg ac ymatebol, gan ddarparu profiadau sy’n ymateb yn dda i anghenion a diddordebau unigol disgyblion. Trwy’r gweithgareddau hyn, caiff disgyblion eu cymell i ddatblygu ystod eang o fedrau, gan gynnwys datrys problemau, cyfathrebu a gweithio mewn tîm. Mae’r cwricwlwm cyfoethog hwn yn cefnogi datblygiad personol disgyblion trwy eu galluogi i wynebu heriau hylaw, dysgu trwy brofi a methu a datblygu strategaethau i oresgyn anawsterau. O ganlyniad, mae llawer o ddisgyblion yn datblygu gwydnwch, mwy o hunanddibyniaeth a gwell gallu i reoli eu hemosiynau. I lawer o ddisgyblion, mae’r ymddiriedaeth a roddir ynddynt i ymdopi ag amgylcheddau newydd ac ymddwyn yn barchus mewn mannau cyhoeddus yn meithrin eu hunanhyder yn llwyddiannus ac yn darparu sylfeini cadarn ar gyfer dysgu pellach.