Daeth yr ymagwedd strategol at ddatblygu addysgeg ar ffurf dau brif weithgaredd.
Roedd y gweithgaredd cyntaf yn seiliedig ar staff yn gweithio mewn triawdau, gan ddatblygu perthnasoedd proffesiynol ac ymddiriedaeth gyda chydweithwyr. Edrychodd staff ar y 12 egwyddor addysgegol. Fe wnaeth pob aelod o’r staff ffilmio’u hunain yn addysgu gwers. Nododd staff ddwy egwyddor y gallent ddangos tystiolaeth ohonynt yn cael eu cyflawni i safon uchel yn eu haddysgu. Gofynnwyd iddynt hefyd wedyn ddewis un o’r 12 egwyddor y teimlent yr oedd angen iddynt ei datblygu. Rhannwyd y wybodaeth hon o fewn eu triawdau, a fu’n cydweithio i gynorthwyo’r athro dan ffocws gyda ffyrdd ymlaen.
Roedd yr ail newid mewn arfer ym Mhantysgallog i ddatblygu addysgeg yn seiliedig ar y modd yr oedd uwch arweinwyr yn ymgymryd ag arsylwadau gwersi fel rhan o Gylch Monitro, Gwerthuso ac Adolygu’r ysgol. Cydnabu’r ysgol fod monitro wedi datblygu’n fecanwaith a oedd yn effeithio’n negyddol ar les staff wrth iddynt fynd yn orbryderus ynglŷn â’r broses, ac effeithiodd hyn yn ei dro ar y modd yr oedd athrawon yn perfformio o dan amodau craffu.
Drwy ymchwil, roedd yr uwch arweinwyr wedi gallu brocera hyfforddiant gan ddarparwr sydd wedi datblygu proses arsylwadol yn seiliedig ar ymagwedd golegol at y broses, sy’n ddibynnol ar ymddiriedaeth. Ymwelir â staff yn fwy cyson ar gyfer arsylwadau, a chânt wybod am yr wythnos pan ymgymerir â’r broses, ond nid yw union amser yr ymweliad yn cael ei gyhoeddi. Mae ymweliadau’n para 20 munud yn unig. Rhoddir adborth gan yr arsylwr yn lleoliad yr ystafell ddosbarth, ac am y tri chylch cyntaf o arsylwadau, mae’r holl farnau a rennir gan yr arsylwr yn canolbwyntio ar agweddau cadarnhaol ar yr hyn a welwyd yn y sesiwn. Mae staff a arsylwir yn cael cyfle i fwydo’u barnau i’r broses hefyd. Mae’r ffurflen adborth wedi’i rhannu’n agweddau gwahanol ar addysgeg, ac mae’r ffurflen yn cynnwys hyperddolenni at erthyglau sy’n seiliedig ar ymchwil a deunyddiau datblygiad proffesiynol a all fod yn bwynt cyfeirio i staff.
Yn ystod y pedwerydd ymweliad, mae’r arsylwr yn gofyn am ganiatâd gan yr athro dosbarth wedyn i ddarparu barnau ar ba feysydd arfer y mae angen rhoi ffocws i’w datblygu, a thrafod sut gellir cyflawni’r datblygiad hwn.
Mae amcanion allweddol a arweiniodd y newid hwn mewn arfer:
- Aeth i’r afael â dymuniad ar y cyd ymhlith uwch arweinwyr a staff i sicrhau gwelliant a safonau uchel cynaledig mewn addysgu a dysgu.
- Byddai’n datblygu proses na fyddai’n effeithio’n negyddol ar les staff, a byddai’r broses yn darparu portread cywir o arfer mewn ystafelloedd dosbarth.
