Adroddiad thematig |
Pa mor effeithiol yw'r ddarpariaeth ar gyfer dysgwyr rhwng 16 ac 19 oed sydd ag anghenion caffael Saesneg? Gorffennaf 2009
Yn gyffredinol, mae athrawon a dysgwyr yn teimlo bod cymorth ar gyfer dysgwyr ag anghenion caffael Saesneg ar gyfer dysgwyr 16-19 oed yn dda. Fodd bynnag, nid oes digon o staff cymwys sy’n gallu cefnogi dysgwyr y mae Saesneg yn iaith ychwanegol neu’n ail iaith iddynt. O ganlyniad, nid yw mwyafrif helaeth o’r dysgwyr hyn yn dal i fyny â chyflymder gwersi neu sesiynau hyfforddi.Yn ychwanegol, nid oes strategaeth genedlaethol i ddod â’r sefydliadau sy’n gweithio gyda dysgwyr ag anghenion caffael Saesneg at ei gilydd, ac mae hyn wedi arwain at amrywiad yn y ddarpariaeth rhwng addysg bellach ac ysgolion.
Argymhellion
Dylai Llywodraeth Cymru:
- sefydlu arweiniad strategol cenedlaethol ar gyfer dysgwyr ag anghenion caffael Saesneg;
- datblygu cynllun strategol ag amcanion a blaenoriaethau clir ar gyfer cefnogi dysgwyr ag anghenion caffael Saesneg; a
- phenodi swyddog arbenigol ar gyfer gweithredu’r amcanion a’r blaenoriaethau hyn.
Dylai darparwyr:
- wella medrau athrawon rheng flaen i gefnogi dysgwyr ag anghenion caffael Saesneg; a
- chryfhau’r adnoddau i sicrhau bod digon o staff cymwys arbenigol i fodloni anghenion dysgwyr.
Dylai Partneriaethau Plant a Phobl Ifanc:
- ddatblygu polisi ar gyfer rhannu gwybodaeth yn effeithiol rhwng partneriaid allweddol;
- arfarnu a gwella cynllunio trosglwyddo ar gyfer dysgwyr ag anghenion caffael Saesneg; a
- datblygu a gweithredu strategaeth i sicrhau bod dysgwyr bregus yn cael cymorth targedig.