Datblygu’r Gymraeg a’r diwylliant Cymreig
Mae’r ddarpariaeth ar gyfer datblygu gallu’r disgyblion i siarad Cymraeg yn naturiol yn gryfder. Mae ethos cryf o Gymreictod yn nodwedd amlwg o’r cwricwlwm ac yn plethu’n effeithiol drwy fywyd a gwaith yr ysgol. Mae ffocws ysgol gyfan ar ddatblygu medrau llafaredd Cymraeg disgyblion ac mae staff yn gweithredu fel modelau rôl iaith cryf. Mae’r cyfleoedd dyddiol i ddatblygu patrymau iaith a chystrawennau cywir yn meithrin siaradwyr Cymraeg rhugl, safonol o oed cynnar. Mae’r cynnydd yn glir a cheir dilyniant cadarn ym medrau ieithyddol y disgyblion, gyda’r rhan fwyaf yn defnyddio iaith aeddfed a chyfoethog erbyn iddynt gyrraedd brig yr ysgol.