Arweinyddiaeth strategol yn hybu lles disgyblion a datblygu dinasyddion egwyddorol, gwybodus
Mae arweinyddiaeth ysbrydoledig y pennaeth a’i hymroddiad amlwg i hybu lles disgyblion yn greiddiol i holl agweddau gwaith yr ysgol. Mae hyn yn creu amgylchedd cefnogol a chynhwysol sy’n annog disgyblion i ymgysylltu’n gadarnhaol â’u dysgu ac i lwyddo. Nodwedd arbennig o’r ysgol yw’r modd y mae’n hyrwyddo parch a goddefgarwch at eraill. Drwy bartneriaethau a phrosiectau llwyddiannus gyda’r ‘Henaduriaeth Arfon’ yn ogystal â gwaith pwyllgorau disgyblion amrywiol, mae disgyblion yn datblygu eu hymwybyddiaeth ysbrydol a moesol gan arwain prosiectau sy’n hybu gwerthfawrogiad rhieni a’r gymuned o ystyr heddwch. Yn ogystal, maent yn codi arian i gefnogi ysgol yn Nairobi ac, o ganlyniad, yn datblygu ymdeimlad disgyblion o berthyn i’w cymuned leol a chymuned ehangach y byd.