Cydweithio effeithiol rhwng staff yr unedau trochi a pherfformwyr creadigol i gefnogi disgyblion i ddatblygu eu medrau caffael iaith trwy’r prosiect ‘Tirwedd’
Mae pennaeth y gyfundrefn wedi gwneud cais am grant cyfalaf er mwyn cefnogi disgyblion i ddatblygu eu hyfedredd a hyder yn eu medrau Cymraeg. Trwy hyn, mae staff wedi cydweithio’n gyson gydag ysgolion cynradd mewn dwy ardal wahanol o’r awdurdod ynghyd â pherfformwyr creadigol cwmni drama er mwyn trefnu dathliad creadigol yng nghymunedau lleol y disgyblion. Mae staff yr unedau wedi hyfforddi perfformwyr creadigol er mwyn eu huwch-sgilio ag arferion trochi effeithiol wrth iddynt gydweithio â’r disgyblion i greu cyweithiau artistig. Trwy hyn, wrth gynnal y gweithdai creadigol, defnyddiodd y perfformwyr ddulliau trochi effeithiol yn gyson gyda’r disgyblion er mwyn eu cefnogi i ddefnyddio a chymhwyso’r Gymraeg o fewn y celfyddydau mynegiannol.Darparwyd cyfle i’r disgyblion gyflwyno eu cyweithiau artistig fel rhan o orymdaith Gŵyl Ddewi yn nghymunedau lleol y disgyblion. Trwy gydweithio effeithiol gyda phartneriaid eraill, er enghraifft y Siarter Iaith a’r mentrau iaith, llwyddwyd i godi balchder a hyfedredd y disgyblion yn Gymraeg. Mae hyn yn cyfrannu’n llwyddiannus at ddatblygu gwerthfawrogiad rhieni ac aelodau’r gymuned ehangach o werth a budd y Gymraeg.