Adroddiad thematig Archives - Page 2 of 31 - Estyn

Math o Adnodd Gwella: Adroddiad thematig

Math o Adnodd Gwella: Adroddiad thematig

Rhannu'r dudalen hon
Mae plentyn mewn siwmper coch yn dringo wal ddringo pren mewn iard gefn.

Crynodeb gweithredol

Mae’r adroddiad hwn yn ystyried pa mor effeithiol yw’r cymorth a’r ddarpariaeth a gynigir gan ddarparwyr addysg y blynyddoedd cynnar o ran mynd i’r afael ag effeithiau andwyol tlodi ac anfantais ar blant yn y blynyddoedd cynnar.

Mae’n canolbwyntio ar ba mor dda y mae awdurdodau lleol a gwasanaethau gwella ysgolion yn cefnogi’r darparwyr hyn â dulliau addysgegol y blynyddoedd cynnar, a sut orau i gynorthwyo plant y mae tlodi ac anfantais yn cael effaith andwyol arnynt. Mae hefyd yn ystyried pa mor dda y mae lleoliadau ac ysgolion na chynhelir a ariennir yn defnyddio’u cyllid o’r Grant Datblygu Disgyblion Blynyddoedd Cynnar (GDDBC)1 ar ymyriadau cynaliadwy i wella cyrhaeddiad plant y caiff tlodi ac anfantais effaith andwyol arnynt. Yn olaf, mae’r adroddiad yn ystyried pa mor dda y mae’r ddarpariaeth ar gyfer chwarae a dysgu mewn lleoliadau ac ysgolion yn cynorthwyo plant yn eu datblygiad a’r cyfnod pontio rhwng lleoliadau ac ysgolion. Mae wedi’i seilio ar ymgysylltu â sampl o 31 o leoliadau nas cynhelir, ysgolion meithrin, cynradd a phob oed. Ystyriom dystiolaeth o 15 awdurdod lleol, hefyd.

Canfuom fod amrywiad o ran sut y ceir mynediad at addysg gynnar ledled Cymru, yn dibynnu ar sut mae awdurdodau lleol yn darparu addysg feithrin. Mae’r amrywiad hwn yn arwain at ddarpariaeth annheg ledled Cymru. Yn ymarferol, mae hyn yn golygu bod rhieni yn aml yn cael ychydig iawn o ddewis, neu ddim dewis o gwbl, ynglŷn â ble y gallant gael addysg feithrin ar gyfer eu plentyn.

Roedd amrywiad mewn hygyrchedd dysgu proffesiynol yn y blynyddoedd cynnar ar gyfer y sector, gydag arweinwyr yn y sector nas cynhelir yn fwy tebygol o fod wedi cael mynediad at ddysgu proffesiynol o ansawdd uchel yn y blynyddoedd cynnar gan eu hawdurdodau lleol a sefydliadau ymbarél2 nag ymarferwyr mewn ysgolion. Fodd bynnag, dywedodd llawer o arweinwyr ysgolion fod dysgu proffesiynol cyfyngedig i gefnogi addysgeg effeithiol y blynyddoedd cynnar yn cael ei gynnig gan awdurdodau lleol a gwasanaethau gwella ysgolion.

Yn ystod ein hymweliadau, dywedodd arweinwyr o leoliadau ac ysgolion nas cynhelir fod llawer o deuluoedd yn profi effaith negyddol tlodi ac anfantais ar lefel waeth o lawer na’r hyn a welwyd yn y gorffennol. O ganlyniad, roedd cyfran fawr o’u hamser a’u hadnoddau yn cael eu defnyddio i fynd i’r afael â’r anghenion hyn. Bron ym mhob achos, roedd lleoliadau ac ysgolion yn treulio amser yn dod i adnabod y plant a’u teuluoedd yn dda. Roeddent yn treulio amser yn meithrin perthnasoedd cefnogol ac ymddiriedus. Er nad oedd arweinwyr wedi cael hyfforddiant na gwybodaeth benodol gan awdurdodau lleol am sut orau i ddiwallu anghenion cymdeithasol, emosiynol a datblygiadol plant yn y blynyddoedd cynnar y mae tlodi ac anfantais yn cael effaith andwyol arnynt, roeddent yn gwybod ac yn deall pwysigrwydd cynorthwyo teuluoedd a’r gwahaniaeth yr oedd hyn yn ei wneud i’w bywydau. Roedd hyn yn aml ar ffurf cymorth ymarferol fel cydweithio â’r trydydd sector i ddarparu bwydydd, teganau, gwisg ysgol, a chymorth ymarferol â materion fel tai.

Mae’r GDDBC yn darparu cyllid i ysgolion a lleoliadau i gynorthwyo plant 3-4 oed â’u hanghenion cyfathrebu, lles a chorfforol. Canfu ein hadolygiad fod annhegwch o ran cyllid ar draws y sectorau nas cynhelir yng Nghymru, oherwydd cymhlethdodau fformiwlâu cyllido ac anhawster casglu data ar y grŵp oedran hwn. O ganlyniad i hyn, mae awdurdodau lleol nad ydynt yn ariannu addysg gynnar yn y sector nas cynhelir yn derbyn cyllid, ac awdurdodau lleol â lefelau uchel o amddifadedd yn derbyn cyllid cyfyngedig.

Roedd y rhan fwyaf o leoliadau nas cynhelir sy’n derbyn cyllid GDDBC dirprwyedig yn gwneud defnydd da o’r arian hwn i brynu adnoddau a oedd yn helpu datblygu anghenion cyfathrebu a lles plant, fel offer awyr agored ac adnoddau lleferydd ac iaith. Roeddent yn mynychu hyfforddiant buddiol a oedd yn eu cynorthwyo â’u rolau, yn enwedig wrth gefnogi medrau cyfathrebu plant. Yn ychwanegol, roeddent yn cyfoethogi profiadau plant trwy amrywiaeth o ymweliadau, yn ogystal â gwahodd ymwelwyr i’r lleoliad. Fodd bynnag, yn yr awdurdodau lleol hynny lle roedd yr arian grant yn cael ei gadw’n ganolog, nid oeddent bob amser yn targedu hyfforddiant yn ddigon da at fynd i’r afael ag anfantais neu’n targedu’r lleoliadau mwyaf difreintiedig yn ddigon da.

Yn y rhan fwyaf o ysgolion, roedd arweinwyr yn aml yn defnyddio’r cyllid hwn i gynnal y ddarpariaeth bresennol. Er enghraifft, roeddent yn cyflogi oedolion ychwanegol i ddarparu cymhareb oedolyn / disgybl addas yn nosbarthiadau’r blynyddoedd cynnar.Mewn ychydig o enghreifftiau, roedd yr ymarferwyr hyn yn cyflawni ymyriadau lleferydd ac iaith ac iechyd a lles emosiynol. Mewn lleiafrif o ysgolion, nid oedd arweinwyr yn gallu gwahanu eu cyllid GDDBC oddi wrth eu cyllid ehangach o’r GDD, ac felly, nid oeddent yn gallu dyrannu eu cyllid mewn ffordd dargedig yn ddigon da.

Mae llawer o arweinwyr yn darparu cyfleoedd buddiol i blant a’u teuluoedd ddod i adnabod ymarferwyr a’r lleoliad neu’r ysgol cyn dechrau yno. Mae hyn yn cynnwys pan fydd plant yn pontio o’r cartref i leoliad neu ysgol, neu rhwng lleoliad ac ysgol.

Math o Adnodd Gwella: Adroddiad thematig

Rhannu'r dudalen hon

Yn ystod tymhorau’r gwanwyn a’r haf 2024, ymunodd arolygydd Estyn â phrofiad o gefnogi dysgwyr ag anghenion dysgu ychwanegol (ADY) ag ymweliadau arolygwyr cyswllt â phob coleg addysg bellach (AB) yng Nghymru. Yn ystod pob ymweliad, fe wnaethant gyfarfod â staff allweddol i drafod diwygio ADY1 a sut roedd ei roi ar waith yn dod yn ei flaen ym mhob coleg. Llywiodd canfyddiadau’r ymweliadau hyn yr adroddiad hwn.

Nod y Ddeddf ADY a’r Rhaglen Trawsnewid ADY ehangach yw trawsnewid y systemau ar wahân ar gyfer anghenion addysgol arbennig (AAA) mewn ysgolion neu unedau cyfeirio disgyblion (UCDau) ac anawsterau dysgu ac/neu anableddau mewn addysg bellach i greu system unedig i gefnogi dysgwyr o 0 i 25 oed sydd ag ADY.

At ei gilydd, crybwyllodd colegau eu bod ar gamau amrywiol o ran rhoi’r ddeddf ADY ar waith. Ar ben hynny, roedd pob coleg yn cefnogi carfanau gwahanol ag ystod amrywiol o anghenion dysgu ychwanegol. Er enghraifft, roedd y rhan fwyaf o golegau’n cefnogi dysgwyr ag anghenion dysgu ychwanegol mwy cymhleth ar gyrsiau medrau byw’n annibynnol ac roedd gan leiafrif ohonynt berthynas gref sefydledig â choleg arbenigol annibynnol i wella darpariaeth mewn partneriaeth.

Nododd bron pob un o’r colegau yr ymwelom â nhw gynnydd yn nifer y dysgwyr ag ADY, yn ogystal ag anawsterau iechyd meddwl a gorbryder ers y pandemig. Yn ogystal, nododd ychydig o golegau gynnydd yn nifer y dysgwyr yn ymuno a oedd wedi cael eu haddysgu gartref yn flaenorol, felly mae gwybodaeth gyfyngedig ar gael am unrhyw anghenion dysgu ychwanegol.

Roedd llawer o’r colegau hyn yn cynnal nifer o wahanol fathau o ddarpariaeth yr oedd y diwygio ADY yn effeithio arnynt lle mae dysgwyr ar gofrestr y coleg. Roedd y rhain yn cynnwys rhaglenni cyflogadwyedd ieuenctid Twf Swyddi Cymru+ a phrentisiaethau iau2. Mewn ychydig o achosion, roedd darpariaeth ar gyfer dysgwyr mwy cymhleth, sydd wedi’u cofrestru fel colegau arbenigol annibynnol fel arfer, yn cael ei chyflwyno trwy goleg prif ffrwd i ddechrau, cyn i’r is-sefydliad gofrestru â Llywodraeth Cymru.

Cymhlethwyd y trefniadau hyn ymhellach gan ddaearyddiaeth Cymru. Roedd angen i bron pob un o’r colegau feithrin perthnasoedd a datblygu trefniadau rhannu gwybodaeth â mwy nag un awdurdod lleol. Datblygodd ychydig iawn ohonynt drefniadau rhannu gwybodaeth ag awdurdodau lleol yn Lloegr, hefyd. Crybwyllodd colegau amrywioldeb yn eu perthnasoedd ag ysgolion uwchradd lleol hefyd yn seiliedig ar b’un ai nhw oedd y prif ddarparwr addysg drydyddol yn yr ardal honno ai peidio.

Cwblhaom ein hadroddiad thematig cyntaf ar ddiwygio ADY ym mis Medi 2023, a oedd yn canolbwyntio ar roi Deddf Anghenion Dysgu Ychwanegol a’r Tribiwnlys Addysg ar waith mewn ysgolion ac awdurdodau lleol. Er nad oedd ffocws yr adolygiad yn cynnwys lleoliadau ôl-16, gwnaethom un argymhelliad i awdurdodau lleol yn ymwneud ag addysg ôl-16, sef: datblygu a chyhoeddi eu strategaeth ar gyfer dysgwyr ôl-16 ag ADY.

Yn adroddiad thematig ADY 2023, canfuom mai megis dechrau cael eu datblygu y mae strategaethau awdurdodau lleol ar gyfer darpariaeth ADY ôl-16. Crybwyllodd yr awdurdodau lleol hynny a oedd wedi penodi swyddogion ôl-16 dynodedig eu bod yn meithrin partneriaethau strategol cryfach â darparwyr addysg bellach. Roedd gwybodaeth awdurdodau lleol am golegau arbenigol annibynnol yn llai cadarn ac, o ganlyniad, roedd eu hymgysylltiad â nhw yn fwy cyfyngedig. O ganlyniad, nid oedd awdurdodau lleol yn gallu gwneud penderfyniadau gwybodus am ystod lawn y ddarpariaeth dysgu ychwanegol ar draws y sectorau ôl-16.

Math o Adnodd Gwella: Adroddiad thematig

Rhannu'r dudalen hon
I droi is-deitlau Cymraeg ymlaen, cliciwch y botwm CC

Crynodeb gweithredol

Mae’r adroddiad hwn yn ystyried pa mor dda y mae ysgolion yn gweithio gyda’i gilydd i gefnogi cyfnod pontio disgyblion o’r ysgol gynradd i’r ysgol uwchradd. Mae’n canolbwyntio ar ba mor dda y mae ysgolion yn gweithio gyda’i gilydd i sicrhau bod eu cwricwla a’u haddysgu yn datblygu gwybodaeth, medrau, dealltwriaeth ac ymddygiadau dysgu disgyblion yn effeithiol ar draws y cyfnod pontio. Mae’n ystyried sut mae ysgolion yn cefnogi lles dysgwyr yn y cyfnod pontio pwysig hwn. 

Mae wedi’i seilio ar ymgysylltu â sampl o 23 ysgol gynradd, 13 ysgol uwchradd a 3 ysgol bob oed, a thystiolaeth o’n gwaith arolygu a’n gwaith dilynol er mis Medi 2022. Cymerom dystiolaeth o dri gwasanaeth gwella ysgolion rhanbarthol a thri awdurdod lleol, hefyd. 

Mae ein canfyddiadau’n dangos bod penaethiaid neu uwch arweinwyr o’r rhan fwyaf o glystyrau o ysgolion yn cyfarfod yn rheolaidd i drafod Cwricwlwm i Gymru a sut i gefnogi cyfnod pontio disgyblion o’r ysgol gynradd i’r ysgol uwchradd. Bron ym mhob achos, canolbwyntiodd arweinwyr yn dda ar sicrhau bod trefniadau ymsefydlu buddiol i gefnogi lles disgyblion, a rhoi strategaethau ar waith i gynorthwyo disgyblion ag anghenion dysgu ychwanegol (ADY). Fodd bynnag, mewn llawer o achosion, ac am amrywiaeth o resymau, nid yw gwaith pontio yn ddigon effeithiol i gefnogi datblygiad continwwm dysgu ar gyfer pob disgybl sy’n sicrhau eu bod yn gwneud cynnydd systematig a pharhaus yn eu gwybodaeth, eu medrau, eu dealltwriaeth a’u hymddygiadau dysgu o’r ysgol gynradd i’r ysgol uwchradd.  

Mewn lleiafrif o achosion, mae clystyrau wedi sefydlu grwpiau o athrawon i ystyried enghreifftiau o ddysgu disgyblion, i’w helpu i ddechrau datblygu dealltwriaeth ar y cyd o gynnydd ar draws eu hysgolion. Fodd bynnag, megis dechrau y mae’r arferion hyn, ac yn y rhan fwyaf o achosion, nid oes dealltwriaeth gref o hyd o sut beth yw cynnydd yn y rhan fwyaf o glystyrau o ysgolion. O ganlyniad, nid yw’r arferion hyn wedi gwella pa mor dda y mae dysgu’n datblygu o ysgolion cynradd i ysgolion uwchradd yn ddigon cryf.  

Yn ystod ein hymweliadau, soniodd arweinwyr am ystod o faterion a oedd yn gwneud gwaith clwstwr ar ddatblygu cynnydd y cwricwlwm yn anodd, yn cynnwys cydlynu gwaith amryfal ysgolion cynradd gydag un ysgol uwchradd, gwahanol ddehongliadau o’r cwricwlwm o fewn yr un clwstwr o ysgolion, neu gael yr amser a’r adnoddau i ryddhau staff i weithio gyda’i gilydd. Fe wnaethant nodi bod natur eang y disgrifiadau o ddysgu yn rhywbeth roedd y staff yn eu hysgolion yn ymgodymu â nhw o hyd. Yn aml, roedd arweinwyr ysgolion uwchradd yn nodi bod newidiadau i gymwysterau TGAU yn ychwanegu at anhawster gwneud penderfyniadau am eu cwricwlwm, ond mewn ysgolion mwy effeithiol, roeddent hefyd yn cydnabod bod gwella addysgu yn hanfodol i sicrhau bod disgyblion yn ennill cymwysterau da.     

Mewn ychydig o achosion, mae clystyrau o ysgolion cynradd ac uwchradd wedi gweithio gyda’i gilydd yn gadarnhaol i amlinellu gwybodaeth, medrau a phrofiadau ar draws yr holl feysydd dysgu a phrofiad (MDPh)1 ac wedi defnyddio hyn i ddechrau datblygu dealltwriaeth ar y cyd o gynnydd. Fodd bynnag, hyd yn oed pan mae hyn ar waith, nid yw ysgolion uwchradd bob amser yn ei ddefnyddio i ystyried dysgu blaenorol disgyblion yn ddigon da. O ganlyniad, nid oedd dysgu ym Mlwyddyn 7 a thu hwnt bob amser yn cefnogi datblygiad parhaus a graddol disgyblion. 

Mewn ysgolion pob oed, er gwaethaf potensial yr ymagwedd bob oed at ddysgu, nid oedd cydlynu’r cwricwlwm a chynllunio ar gyfer cynnydd yn gryf bob amser. Yn yr achosion gorau, roedd ysgolion yn gweithio’n bwrpasol i ddatblygu un continwwm dysgu graddol rhwng 3 ac 16 oed, ac roeddent yn dechrau defnyddio hyn i sicrhau eu bod yn cefnogi cynnydd disgyblion. Fodd bynnag, roedd lleiafrif o leoliadau pob oed wedi gwneud cynnydd cyfyngedig ar ddatblygu ymagwedd gydlynus at y cwricwlwm ac yn ystyried dysgu mewn sectorau cynradd ac uwchradd ar wahân o hyd. 

Mae llawer o ysgolion wedi darparu ystod o ddysgu proffesiynol ar gyfer athrawon i gefnogi cyflwyno Cwricwlwm i Gymru. Fodd bynnag, mewn ychydig o achosion yn unig yr oedd clystyrau o ysgolion wedi rhannu ymagweddau at addysgu neu wedi ystyried sut gallent sicrhau bod strategaethau addysgu yn cynorthwyo disgyblion i wneud cynnydd effeithiol a pharhaus o’r ysgol gynradd i’r ysgol uwchradd. Roedd llawer ohonynt yn ymgorffori strategaethau i gynorthwyo disgyblion i fod yn ddysgwyr mwy effeithiol ac yn cydnabod pwysigrwydd sicrhau bod disgyblion yn datblygu medrau i fonitro, rheoli ac asesu dysgu. Fodd bynnag, dim ond mewn ychydig o achosion yr oedd ysgolion wedi ystyried sut gallent sicrhau bod disgyblion yn parhau i ddatblygu’r medrau a’r tueddiadau hyn yn effeithiol pan fyddant yn symud i’r ysgol uwchradd.  

Bron ym mhob achos, roedd ysgolion cynradd yn trosglwyddo ystod eang ac amrywiol o wybodaeth am ddysgu a chynnydd disgyblion i ysgolion uwchradd cyn eu cyfnod pontio. Roedd lleiafrif o glystyrau yn dechrau ystyried sut i rannu gwybodaeth am gynnydd disgyblion, yn unol â Chwricwlwm i Gymru. Fodd bynnag, bron ym mhob achos, prin oedd yr eglurder ynglŷn â beth oedd disgwyliadau o ran dysgu a chynnydd, hyd yn oed o fewn yr un clwstwr. O ganlyniad, ni wnaeth y prosesau hyn rhyw lawer i gefnogi parhad yn nysgu’r disgyblion. Bron ym mhob achos, roedd ysgolion cynradd yn rhannu deilliannau asesiadau personol Llywodraeth Cymru gydag ysgolion uwchradd. Fodd bynnag, roedd bron pob ysgol yn canolbwyntio ar rannu’r sgôr safonedig yn unig. Nid oeddent yn rhoi ystyriaeth ddigon da i’r ystod eang o wybodaeth am ddysgu disgyblion sydd ar gael o’r asesiad na sut y gellir defnyddio hyn i gefnogi addysgu a dysgu ymhellach.  

Bron ym mhob achos, roedd ysgolion yn cefnogi cyfnod ymsefydlu2 disgyblion i’r ysgol uwchradd yn dda. Yn aml, roeddent yn trefnu cyfarfodydd wyneb yn wyneb rhwng arweinwyr neu athrawon o ysgolion cynradd a staff o ysgolion uwchradd a oedd yn galluogi rhannu gwybodaeth yn fuddiol. Roedd ysgolion cynradd ac uwchradd yn gweithio gyda’i gilydd yn gydwybodol i gefnogi cyfnod pontio disgyblion ag ADY. Yn aml, roedd staff sydd â chyfrifoldeb am ddisgyblion ag ADY yn dechrau gweithio gyda’r ysgolion cynradd sy’n eu bwydo pan roedd disgyblion ym Mlwyddyn 6 neu ym Mlwyddyn 5. Helpodd y prosesau hyn ysgolion uwchradd i ddeall a darparu ar gyfer anghenion y disgyblion hyn yn gefnogol.  

Yn y rhan fwyaf o achosion, roedd clystyrau o ysgolion yn cefnogi llawer o agweddau ar les disgyblion yn effeithiol wrth iddynt symud o’r ysgol gynradd i’r ysgol uwchradd. Mewn llawer o achosion, ymwelodd staff o ysgolion uwchradd â’r ysgolion cynradd sy’n eu bwydo i siarad â disgyblion ar ddechrau Blwyddyn 6, ac mewn ychydig iawn o achosion pan maent ym Mlwyddyn 5. Bron ym mhob achos, roedd clystyrau o ysgolion yn nodi disgyblion y gallai’r cyfnod pontio fod yn anos iddynt na’u cyfoedion, ac yn rhoi ystod ddefnyddiol o weithgareddau ac ymweliadau cefnogol ar waith a oedd yn helpu’r disgyblion hyn i bontio i’r ysgol uwchradd. Yn yr achosion gorau, roedd ysgolion yn gweithio gyda’i gilydd i gynllunio a rhoi strategaethau ar waith yn seiliedig ar anghenion disgyblion unigol.  

Roedd llawer o arweinwyr yn ymwybodol o’r arweiniad diweddaraf ar gynllunio pontio a’i ofynion, ac yn defnyddio hyn i gynllunio cyfnod ymsefydlu disgyblion i’r ysgol uwchradd yn briodol. Fodd bynnag, mewn llawer o achosion, roedd diffyg eglurder mewn cynlluniau pontio ar sut byddai ysgolion yn cefnogi parhad yn nysgu disgyblion, a sut byddent yn cyflawni hyn trwy ddylunio a chynllunio’r cwricwlwm ar gyfer dysgu ac addysgu.  

I droi is-deitlau Cymraeg ymlaen, cliciwch y botwm CC

Math o Adnodd Gwella: Adroddiad thematig

Rhannu'r dudalen hon
I droi is-deitlau Cymraeg ymlaen, cliciwch y botwm CC

Crynodeb gweithredol

Yn dilyn cyhoeddi adroddiad ar fedrau darllen Saesneg disgyblion 10-14 oed gan Estyn yn Mai 2023, fe aethom ati i lunio adroddiad ar sut mae ysgolion Cymraeg a dwyieithog yn datblygu medrau darllen Cymraeg disgyblion ar draws y cwricwlwm. Yn Hydref 2023, fe wnaethom ymweld ag ugain o ysgolion cynradd, uwchradd a phob oed cyfrwng Cymraeg a dwyieithog, yn ogystal ag unedau trochi i werthuso medrau darllen Cymraeg disgyblion ar draws y cwricwlwm ym Mlwyddyn 6 a Blynyddoedd 7-9, gan edrych ar yr hyn y mae ysgolion yn ei wneud i ddatblygu’r medrau hyn. Dewiswyd ysgolion yn seiliedig ar eu maint, math, lleoliad daearyddol a’u cyd-destun economaidd-gymdeithasol i ddarparu trawstoriad o ysgolion yng Nghymru. Ym mhob ysgol yr ymwelwyd â hi, cynhaliwyd cyfarfodydd gydag uwch arweinwyr, cydlynwyr llythrennedd, athrawon a disgyblion. Arsylwom sesiynau lle roedd medrau darllen yn cael eu datblygu neu’u hatgyfnerthu. Edrychom ar waith disgyblion ac unrhyw ddogfennau oedd gan yr ysgol ar ddatblygu medrau darllen ac ar drefniadau pontio. Yn ogystal, cynhaliwyd arolwg disgyblion yn Eisteddfod yr Urdd ym mis Mehefin 2023 a dosbarthwyd holiadur i’r ysgolion hynny o fewn y sampl ac fe ymatebodd dros ddwy fil o ddisgyblion. Gwnaethom hefyd dynnu ar dystiolaeth o arolygiadau cynradd, uwchradd a phob oed o ysgolion y tu allan i’r sampl yn ystod 2023-24.

Mae ein hadroddiad ar fedrau darllen Cymraeg yn amlinellu nifer o gryfderau a’r meysydd sydd angen mynd i’r afael â nhw i sicrhau gwelliannau. Yn ychwanegol i’r enghreifftiau o arfer dda yn yr ysgolion, rydym wedi cynnwys canllawiau penodol er mwyn helpu ysgolion i gryfhau eu harferion wrth ddatblygu medrau darllen disgyblion. Mae’r bennod gyntaf, ‘Safonau ac agweddau disgyblion’ yn canolbwyntio ar ddatblygiad medrau darllen disgyblion ar draws y cwricwlwm ac agweddau disgyblion tuag at ddarllen. Mae gan yr ail bennod ddwy ran. Mae’r rhan gyntaf, ‘Profiadau addysgu a dysgu’ yn ystyried yr arlwy sy’n cael ei gynnig gan ysgolion i gryfhau medrau darllen disgyblion tra bod ‘Arweinyddiaeth a chynllunio ar gyfer gwella’ yn nodi sut mae arweinwyr yn blaenoriaethu darllen yn eu hysgolion. Yn ogystal, mae’r adroddiad yn edrych ar ddarpariaeth o fewn yr unedau trochi. Mae’r drydedd bennod, ‘Hybu diwylliant o ddarllen’ yn disgrifio’r modd y mae ysgolion effeithiol yn creu diwylliant darllen yn llwyddiannus ac yn ennyn diddordeb disgyblion yn llawn. Mae Atodiad 1 yn rhestru’r ymatebion i’r holiadur disgyblion a ddosbarthwyd i’r ysgolion hynny o fewn y sampl ac ymatebodd dros ddwy fil o ddisgyblion.

Nid yw’n syndod bod effaith negyddol y pandemig yn parhau yn glir ar safonau darllen Cymraeg disgyblion yn gyffredinol, gyda’r lleiafrif wedi colli’r hyder i gyfathrebu a darllen yn y Gymraeg. Mae bron pob disgybl yn y sampl ac a wnaeth ymateb i’n holiaduron yn deall pwysigrwydd darllen i gefnogi eu dysgu a’u cyfleoedd mewn bywyd yn y dyfodol. Fodd bynnag, i fwyafrif y disgyblion, mae eu mwynhad o ddarllen yn gostwng o 10 i 14 oed.

Mae llawer o bobl ifanc 10 i 14 oed yn defnyddio medrau darllen sylfaenol, fel anodi, lleoli a llithr ddarllen gwybodaeth yn llwyddiannus i ganfod prif negeseuon a gwybodaeth allweddol. At ei gilydd, mae cyfran uwch o ddisgyblion Blwyddyn 6 yn gwneud cynnydd da o ran datblygu eu medrau darllen uwch nag ym Mlynyddoedd 7-9. Mae hyn yn rhannol oherwydd yr heriau o gydlynu datblygiadau medrau darllen yn gyson ar draws yr ystod o bynciau ac athrawon yn y cyfnod uwchradd. Dengys ein canfyddiadau bod y cyfleoedd mwyaf buddiol i ddatblygu medrau darllen i’w gweld mewn gwersi Cymraeg neu sesiynau iaith ac o fewn pynciau’r dyniaethau. Fodd bynnag, nid yw uwch-fedrau darllen mwyafrif y disgyblion ym Mlynyddoedd 7-9 yn datblygu cystal oherwydd diffyg cyfleoedd pwrpasol i ddatblygu’u medrau darllen ar draws y cwricwlwm.

Roedd llawer o’r cryfderau a’r diffygion a ganfuom yn y thematig darllen Saesneg hefyd yn amlwg mewn ysgolion cyfrwng Cymraeg a dwyieithog. Er bod arweinwyr ym mron pob ysgol yr ymwelwyd â nhw yn cydnabod pwysigrwydd blaenoriaethu datblygiad medrau darllen disgyblion, yn aml nid oedd hyn yn arwain at ddarpariaeth effeithiol ar draws y cwricwlwm, yn enwedig yn y sector uwchradd. Megis dechrau mae’r gwaith o gydlynu’r ddarpariaeth ar gyfer datblygu medrau darllen disgyblion yn y mwyafrif o ysgolion uwchradd. Nid oedd arweinwyr yn y lleiafrif o ysgolion cynradd a’r mwyafrif o ysgolion uwchradd a phob oed yn defnyddio ystod digon eang o dystiolaeth i adnabod yr union agweddau sydd angen eu gwella a chynllunio camau gweithredu perthnasol. Roeddent yn or-ddibynnol ar ddata yn unig, yn hytrach na’i gyfuno â thystiolaeth uniongyrchol o gynnydd disgyblion o wersi a llyfrau. Lleiafrif yn unig o arweinwyr oedd yn monitro ac yn gwerthuso effaith strategaethau darllen ar draws yr ysgol yn ddigon cadarn. Prin yw’r cynlluniau neu lwyfannau darllen sydd ar gael trwy gyfrwng y Gymraeg o gymharu â’r Saesneg i helpu ysgolion i fonitro cynnydd darllen disgyblion.

Mae ein canfyddiadau’n dangos mai ychydig iawn o glystyrau o ysgolion cynradd ac uwchradd sy’n cyd-gynllunio’n effeithiol ar gyfer datblygu medrau darllen disgyblion o Flwyddyn 6 i Flwyddyn 7. Mae hyn hefyd yn wir mewn llawer o ysgolion pob oed, sy’n dysgu disgyblion o’r cyfnodau cynradd ac uwchradd. Rhwystr i’r cynllunio hwn yw maint y clwstwr a’r ffaith bod nifer o ysgolion cynradd o fewn dalgylch mwy nag un ysgol uwchradd neu, ar adegau, yn draws-sirol.

Mae’r unedau trochi a’r canolfannau iaith wnaethom ymweld â nhw yn gwneud gwaith effeithiol yn datblygu medrau Cymraeg disgyblion sy’n trosglwyddo o addysg cyfrwng Saesneg yn hwyr. Defnyddiodd athrawon derminoleg a geirfa pwnc yn gywir ac yn gyson a oedd yn caniatáu i ddisgyblion ddatblygu fel siaradwyr rhugl. Gwna’r disgyblion yma gynnydd cyflym a llwyddiannus yn eu medrau darllen Cymraeg.

Mae llawer o ysgolion cynradd ac ychydig o ysgolion uwchradd yn hyrwyddo darllen er pleser yn llwyddiannus. Fodd bynnag, yn gyffredinol, gwelwyd bod y profiadau i hybu darllen sy’n digwydd tu hwnt i’r stafell ddosbarth wedi lleihau yn sylweddol ers cyfnod y pandemig, yn enwedig yn y sector uwchradd.

I droi is-deitlau Cymraeg ymlaen, cliciwch y botwm CC

Math o Adnodd Gwella: Adroddiad thematig

Rhannu'r dudalen hon

Mae’r adroddiad yn canolbwyntio ar risgiau ymddieithrio ar gyfer pobl ifanc yn manteisio ar gymorth gan weithwyr arweiniol yn ystod y cyfnod pontio i addysg ôl-16, hyfforddiant a chyflogaeth.

Argymhellion

Dylai Llywodraeth Cymru, Gyrfa Cymru, awdurdodau lleol, a’r holl bartneriaid eraill sy’n ymwneud â chynorthwyo pobl ifanc trwy weithwyr arweiniol:  

  • Wella cymorth pontio ôl-16 trwy sicrhau parhad yng ngweithiwr arweiniol person ifanc tan 31 Ionawr ar ôl symud person ifanc i’w gyrchfan ôl-16, p’un a yw hyn yn yr ysgol, yn y coleg, gyda darparwr hyfforddiant, neu gyflogaeth 
  • Datblygu ffyrdd o fesur llwyddiant gwaith i atal pobl ifanc rhag bod yn bobl NACH, sydd wedi’u seilio ar werthusiadau tymor hirach ac nad ydynt yn gor-bwysleisio gwerth data arolwg cyrchfan gychwynnol    
  • Cefnogi rhannu data yn well am amgylchiadau pobl ifanc unigol i hwyluso cydweithio cryfach rhwng yr holl bartneriaid, gan gynnwys darparwyr addysg a hyfforddiant, a galluogi pobl ifanc i gael cymorth perthnasol ac amserol  
  • Cefnogi anghenion dysgu proffesiynol gweithwyr arweiniol ym mhob asiantaeth a rhannu arfer effeithiol wrth ddarparu cymorth gweithwyr arweiniol  
  • Gwella arfer yn unol ag arfer effeithiol a geir yn yr adroddiad hwn, a mynd i’r afael â’r diffygion a amlygwyd yn yr adroddiad hwn  

Math o Adnodd Gwella: Adroddiad thematig

Rhannu'r dudalen hon

Argymhellion

Dylai ysgolion: 

  • Ddarparu cyngor ac arweiniad diduedd cynhwysfawr ac amserol i’r holl ddisgyblion a’u rhieni neu’u gofalwyr am holl opsiynau’r cwricwlwm 14-16, gan gynnwys prentisiaethau iau lle mae’r rhain ar gael. 
  • Cydweithio â cholegau ac awdurdodau lleol i werthuso cyfleoedd ar gyfer datblygu neu ymestyn rhaglenni prentisiaethau iau er mwyn ehangu eu harlwy cwricwlwm er budd pennaf y dysgwyr.

Dylai colegau addysg bellach:

  • Weithio’n agos gydag ysgolion i wneud yn siŵr fod cyfrifoldebau am drefniadau diogelu yn glir a bod asesiadau risg unigol yn cael eu cynnal ar gyfer pob un o’r dysgwyr prentisiaethau iau.
  • Rhannu a chytuno ar drefniadau amserlen gydag ysgolion partner ac awdurdodau lleol ar gyfer pob un o’r dysgwyr prentisiaethau iau a rhoi’r wybodaeth ddiweddaraf iddynt am unrhyw newidiadau sy’n effeithio ar ddysgwyr unigol, fel trefniadau cynllun bugeiliol.

Dylai awdurdodau lleol: 

  • Egluro a chyfleu trefniadau cyllid yn y dyfodol ar gyfer prentisiaethau iau gydag ysgolion a cholegau. 
  • Cydweithio â’u holl ysgolion a cholegau lleol i werthuso’r potensial ar gyfer cyflwyno neu ymestyn darpariaeth prentisiaethau iau i ymestyn cyfleoedd dysgu addas ar gyfer disgyblion Blwyddyn 10 ac 11 sy’n cael trafferth ymgysylltu â darpariaeth brif ffrwd bresennol mewn ysgolion.

Dylai Llywodraeth Cymru: 

  • Yn sgil sefydlu’r Comisiwn Addysg Drydyddol ac Ymchwil (CTER), egluro a chyhoeddi manylion am gyfrifoldeb parhaus a threfniadau parhaus ar gyfer prentisiaethau iau a’u cyllid. 
  • Adolygu gofynion penodol y cwricwlwm ar gyfer rhaglenni prentisiaethau iau fel yr amlinellir yng nghyfeiriadur rhaglenni Llywodraeth Cymru, yn enwedig o ran cymwysterau Saesneg, mathemateg a rhifedd, i sicrhau bod nodau cymhwyster yn gweddu i anghenion a galluoedd dysgwyr unigol, ac yn adlewyrchu’r cymwysterau 14-16 cenedlaethol newydd sydd ar waith o fis Medi 2027.

Math o Adnodd Gwella: Adroddiad thematig

Rhannu'r dudalen hon

Argymhellion

Dylai ysgolion:

  • Gryfhau cynllunio i wella presenoldeb yn strategol, gan gynnwys gwneud defnydd effeithiol o ddata i nodi tueddiadau ac mewn cynllunio ymagweddau tymor hir at wella presenoldeb disgyblion
  • Cryfhau eu hymagwedd at fonitro, gwerthuso a gwella presenoldeb
  • Cryfhau eu gwaith gyda rhieni / gofalwyr i esbonio pam mae presenoldeb da yn bwysig
  • Datblygu dulliau mwy effeithiol i gasglu barn disgyblion nad ydynt yn mynychu’r ysgol yn rheolaidd
  • Sicrhau bod addysgu ac arlwy’r cwricwlwm yn ennyn diddordeb disgyblion mewn dysgu

Dylai awdurdodau lleol:

  • Roi her a chymorth rheolaidd ac effeithiol i ysgolion i wella presenoldeb disgyblion a helpu gwerthuso effaith eu gwaith
  • Sicrhau bod ymyriadau awdurdodau lleol yn adeiladu ar waith a wnaed eisoes gan ysgolion
  • Gweithio gydag ysgolion i’w cynorthwyo i weithio gyda rhieni / gofalwyr i ddeall pwysigrwydd presenoldeb da

Dylai Llywodraeth Cymru:

  • Ddatblygu ymgyrch genedlaethol i hyrwyddo pwysigrwydd presenoldeb da gyda rhieni / gofalwyr a disgyblion
  • Ystyried sut gallai disgyblion sy’n byw o fewn y radiws tair milltir nad ydynt yn gymwys i gael cludiant am ddim gael eu cynorthwyo’n well i fynychu’r ysgol yn fwy rheolaidd
  • Cyhoeddi setiau data craidd ar gyfer presenoldeb ddwywaith y flwyddyn, gan gynnwys dadansoddiad atchweliad, gweddillebau ar gyfer absenoldebau parhaus
  • a phresenoldeb grwpiau blwyddyn i gefnogi prosesau gwerthuso’r ysgolion eu hunain yn well
  • Parhau i ddarparu dadansoddiad wythnosol o bresenoldeb ar lefel ysgol i ddarparu gwybodaeth fwy mynych a gwella ansawdd y data hwn
  • Ystyried sut y gellir dyrannu cyllid yn fwy effeithiol i gynorthwyo ysgolion i wella presenoldeb
  • Ystyried sut gallai diwygio’r flwyddyn ysgol gynorthwyo disgyblion yn well i fynychu’r ysgol yn fwy rheolaidd
  • Ymchwilio i nodi’r ffactorau sy’n effeithio ar bresenoldeb gwael a darganfod y dulliau mwyaf effeithiol o wella presenoldeb

Math o Adnodd Gwella: Adroddiad thematig

Rhannu'r dudalen hon

Argymhellion

Dylai Llywodraeth Cymru:

  • A1    Gydweithio â Cymwysterau Cymru a’r Comisiwn Addysg Drydyddol ac Ymchwil i adolygu’r defnydd o gymwysterau Sgiliau Hanfodol Cymru mewn prentisiaethau
  • A2   Adnewyddu Pecyn Cymorth Sgiliau Hanfodol Cymru (WEST) ac adnoddau
  • A3    Trwy gydweithio â phartneriaid, datblygu cyfleoedd ar gyfer dysgu proffesiynol i wella dealltwriaeth ymarferwyr o’r addysgeg a’r gallu i gyflwyno medrau hanfodol

Dylai darparwyr prentisiaethau dysgu yn y gwaith:

  • A4    Ddatblygu ymagweddau gweithio mewn partneriaeth er mwyn sicrhau:
    • y caiff dysgwyr gyfleoedd ystyrlon i astudio ac ymgymryd ag asesiadau’n ddwyieithog neu trwy gyfrwng y Gymraeg 
    • y caiff anghenion dysgu ychwanegol dysgwyr eu nodi a’u gwerthuso’n brydlon a’u cefnogi’n  briodol
  • A5    Sicrhau bod dysgwyr sydd eisoes wedi ennill y cymwysterau SHC gofynnol neu sydd wedi’u heithrio trwy ddirprwy yn parhau i ddatblygu eu medrau llythrennedd, rhifedd a digidol
  • A6    Cynnig dysgu proffesiynol sy’n datblygu addysgeg tiwtoriaid ac aseswyr i gyflwyno medrau hanfodol

Dylai darparwyr arweiniol:

  • A7    Sicrhau bod hunanwerthuso’n myfyrio ar effeithiolrwydd y modelau cyflwyno sy’n cael eu defnyddio ar draws partneriaid ac isgontractwyr y darparwr ac yn cymryd camau i leihau’r anfanteision posibl a nodir yn yr adroddiad hwn