Arfer effeithiol Archives - Page 45 of 69 - Estyn

Math o Adnodd Gwella: Arfer effeithiol

Math o Adnodd Gwella: Arfer effeithiol

Rhannu'r dudalen hon
Mae dau fyfyriwr mewn gwisgoedd ysgol las yn pori llyfrau mewn llyfrgell, un yn gwenu wrth y camera tra'n cadw llyfrau.
 

Cyd-destun a chefndir yr arfer effeithiol neu arloesol

Yn 2010, mabwysiadodd yr ysgol raglen sy’n seiliedig ar wobrau, a ddatblygwyd yn UDA, i ymateb i ymddygiad problemus difrifol nifer fach o ddisgyblion.  Mireiniodd uwch arweinwyr yn Aran Hall y rhaglen fel y gallai staff roi’r rhaglen ar waith yn llwyddiannus ar draws y lleoliadau addysg a phreswyl.  Trwy ddefnyddio pecyn hyfforddiant medrau ymddygiadol, hyfforddwyd nifer fach o staff addysg a staff preswyl i ddechrau er mwyn defnyddio’r rhaglen gyda dau ddisgybl.  Wedyn, rhoddodd uwch arweinwyr y rhaglen ar waith ar draws yr ysgol.  Erbyn hyn, mae staff yn rhoi’r rhaglen ar waith ym mhob dosbarth, yn yr unedau preswyl a phan fydd disgyblion yn mynd i’r gymuned ehangach ar gyfer lleoliadau coleg a gwaith.

Disgrifiad o natur y strategaeth neu’r gweithgaredd

System pwyntiau a lefelau integredig yw’r rhaglen, sy’n gwobrwyo disgyblion am ddangos medrau rhag-gymdeithasol sy’n gysylltiedig â llwyddiant mewn ysgol prif ffrwd, coleg neu weithle.  Mae disgyblion yn derbyn pwyntiau am fynychu’r ysgol neu’r coleg yn brydlon, gweithio ar y dasg benodol, cwblhau’r dasg benodol a dangos ymddygiad diogel a pharchus.  Wedyn, bydd disgyblion yn cyfnewid y pwyntiau a ddyfarnwyd gan staff am atgyfnerthwyr wrth gefn fel gemau cyfrifiadur, cylchgronau a dyfeisiau cerddoriaeth cludadwy. 

Mae gan bob un o’r disgyblion amserlen gweithgareddau dyddiol sy’n rhannu’r diwrnod yn ddeg cyfnod 30 munud.  Ar ddiwedd pob cyfnod o 30 munud, mae’r aelod staff a neilltuir i bob disgybl yn dyrannu pwyntiau, sy’n dibynnu a yw’r disgybl wedi dangos yr ymddygiad priodol.  Wrth i ddisgyblion ddangos cyfraddau cynyddol o ymddygiad rhag-gymdeithasol ac academaidd, cânt eu dyrchafu trwy’r system lefelau ac, wrth wneud hynny, gallant elwa ar amrywiaeth well o weithgareddau atgyfnerthu.  Yn gyfochrog â hyn, mae’r disgyblion yn treulio mwy o amser ar dasgau academaidd a llai ar weithgareddau gwobrwyo.

Beth fu effaith y gwaith hwn ar ddarpariaeth a safonau dysgwyr?

Mae’r rhaglen wedi helpu mwyafrif y disgyblion i reoli eu hymddygiad eu hunain yn llwyddiannus.  O ganlyniad, mae disgyblion yn mynychu’r ysgol yn rheolaidd erbyn hyn, yn trin pobl eraill ag urddas a pharch, yn defnyddio’r gymuned yn ddiogel, yn mynychu lleoliadau coleg a phrofiad gwaith ac yn ennill achrediad perthnasol am eu gwaith.  

Sut ydych chi wedi rhannu eich arfer dda?

Mae’r ysgol wedi rhannu ei harfer dda trwy dri phapur academaidd ac mewn cynadleddau yn y DU ac UDA.  Mae’r ysgol yn croesawu ymwelwyr o ysgolion a phobl broffesiynol eraill o bob cwr o’r DU yn rheolaidd.  Mae nifer fach o ysgolion yng Nghymru a Lloegr yn defnyddio amrywiadau o’r rhaglen.

Math o Adnodd Gwella: Arfer effeithiol

Rhannu'r dudalen hon
 

Cyd-destun a chefndir i’r arfer effeithiol neu arloesol

Oherwydd i’r ysgol gael ei hagor am y tro cyntaf yn 2012, roedd gan y staff yr hyblygrwydd i wneud penderfyniadau pellgyrhaeddol am y fath o ysgol roeddent am ei sefydlu. Mae ystyriaethau o ran dysgu ac addysgu wedi bod yn ganolog i’r holl benderfyniadau. Penderfynodd y staff ganolbwyntio ar brynu technoleg symudol yn hytrach na gwario’n drwm ar gyfrifiaduron mewn ystafell ddosbarth er mwyn hyrwyddo dysgu ac addysgu o’r safon uchaf.  Canlyniad hyn oedd penderfynu ar ddarparu llechi cyfrifiadurol ar gyfer pob disgybl ym Mro Edern.

Disgrifiad o natur y strategaeth neu’r gweithgaredd

Gweledigaeth Bro Edern oedd plethu technoleg gwybodaeth a chyfathrebu ymhob gwers yn ddi-ffwdan, a defnyddio’r dechnoleg ddiweddaraf fel arf ychwanegol ar gyfer disgyblion ac athrawon fel ei gilydd.  Ers y dyddiau cynnar, mae’r defnydd o dechnoleg wedi cael ei fabwysiadu ar draws y pynciau, ac mae dyfodiad y Fframwaith Cymhwysedd Digidol wedi cadarnhau’r feddylfryd hon.

Hyfforddiant Staff

Mae hyder a hyfedredd digidol staff yn allweddol i sicrhau fod y digidol yn cael effaith gadarnhaol ar y dysgu ac addysgu.  Y nod yw ceisio sicrhau fod staff yn hyddysg yn y datblygiadau digidol diweddaraf, ac mae hyfforddiant cyson wedi cael ei ddarparu i arfogi athrawon yr ysgol.  Fel ysgol newydd sy’n tyfu’n sylweddol bob mis Medi, mae nifer o staff newydd yn ymuno bob blwyddyn. Yn 2017-2018, cafodd yr holl staff newydd fentor digidol personol, a oedd hefyd yn aelod o staff, yn ogystal ag ‘Arweinydd Digidol’ personol o blith y disgyblion. Mae disgyblion yn ymgeisio’n flynyddol am rôl fel ‘Arweinydd Digidol’, ac mae’r criw llwyddiannus yn cael hyfforddiant a chyfarfodydd i drafod materion digidol, yn mentora staff ac yn darparu hyfforddiant i staff newydd. Mae hyn yn eu galluogi i ddysgu gan y disgyblion beth yw’r profiadau dysgu digidol ar draws y cwricwlwm ym Mro Edern.  Ar ddechrau blwyddyn academaidd 2017-2018, cynhaliwyd noson hyfforddi ar gyfer yr holl staff, gyda dewis o 16 o sesiynau ar garwsel.  Darparwyd y sesiynau gan aelodau o staff a disgyblion yr ysgol ar nifer o dechnegau dysgu ac addysgu digidol a chyflwynwyd meddalwedd neu apiau defnyddiol newydd. Gyda’r rhyddid i ddewis eu sesiynau, galluogodd hyn i’r staff gymryd cyfrifoldeb am eu datblygiad proffesiynol eu hunain a chael noson o fireinio’u medrau yn ôl eu hanghenion unigol a phynciol.

Ar foreau dydd Iau am 8am, mae’r ysgol yn cynnal sesiwn ‘Arfer Dda a Pain au Chocolat’. Mae’r cyflwyniadau 20 munud gwirfoddol hyn yn boblogaidd iawn ac yn fodd i staff gael hyfforddiant wythnosol ar un syniad digidol neu un agwedd ymarferol o arfer dda ar lawr y dosbarth. Mae’r ‘pains au chocolat’ blasus o bopty lleol yn abwyd effeithiol. Rhoddir holl gyflwyniadau hyfforddi’r staff ar wefan Dysgu ac Addysgu mewnol yr ysgol, er mwyn i staff fedru cyfeirio atynt drachefn. Mae’r wefan bellach yn storfa ddefnyddiol o adnoddau hyfforddiant digidol i staff presennol ac i unrhyw staff newydd fydd yn ymuno â’r ysgol.

Yn ogystal, ceir ffocws digidol i Weithgorau Gwella Ysgol bob blwyddyn. Mae’r holl athrawon yn aelod o un o weithgorau’r ysgol. Boed fel gweithgor ‘Gwersi Croes o Gyswllt’ (term yr ysgol ar gyfer Flipped Learning), neu weithgor ‘Ymateb i Dargedau’, ceir mewnbwn digidol cyson. Mae’r Gweithgor Ymateb i Dargedau wedi dyfeisio system ysgol gyfan, ble mae disgyblion ym mhob adran yn sganio cod QR ar ddiwedd tasgau er mwyn cwblhau ymarferion pellach wrth ymateb i dargedau. Mae’r adrannau oll wedi creu banc o adnoddau pwrpasol ar gyfer hyn ac mae hyn yn galluogi disgyblion i weithio’n annibynnol a gwneud y cam nesaf yn eu dealltwriaeth o’u pynciau. Dechreuwyd ar y gwaith cynllunio ym mlynyddoedd cyntaf yr ysgol, a chynlluniwyd gweithgareddau ar draws y cwricwlwm a fyddai’n datblygu medrau digidol addas i ddisgyblion yn yr unfed ganrif ar hugain.  Gyda dyfodiad y Fframwaith Cymhwysedd Digidol, mapiwyd y ddarpariaeth bresennol i benawdau’r Fframwaith newydd a chynlluniodd yr adrannau weithgareddau ychwanegol a fyddai’n cyfoethogi dealltwriaeth disgyblion o’u pwnc, tra’n parhau i wella’u medrau digidol.

Pa effaith y mae’r gwaith hwn wedi’i chael ar ddarpariaeth a safonau dysgwyr?

Mae effaith dysgu digidol i’w gweld ym mhob gwers ar draws yr ysgol. Mae’r ffaith fod technoleg hygyrch gan bob disgybl yn eu bag yn golygu fod ganddynt arf pwerus i gyfoethogi’u dysgu. Mae adrannau’n darparu cyrsiau iTunes U ar gyfer eu dosbarthiadau, sy’n golygu y gallant gyrchu unrhyw adnoddau’n syth ar yr iPad, boed yn y dosbarth, neu o’r cartref. Mae’r clwb gwaith cartref nosweithiol tan 5 yn fodd i ddisgyblion aros yn yr ysgol i gwblhau tasgau o bob math, ond gallant hefyd gael mynediad i rwydwaith diwifr yr ysgol a chymorth gan un o’r anogwyr dysgu.

Ar lawr y dosbarth, mae sganio cod QR er mwyn gweld fideo mewn gwers addysg gorfforol yn digwydd yn hollol naturiol. Mae ffilmio arbrofion gwyddonol, tynnu lluniau ar gyfer celf, cyfansoddi a recordio caneuon mewn gwersi cerdd a recordio sgyrsiau mewn gwersi Almaeneg a Ffrangeg yn golygu fod disgyblion yn dysgu mewn ffyrdd amrywiol ar hyd yr ysgol. Yn enwedig, mae’r gallu i recordio a ffilmio ar draws y cwricwlwm er mwyn gwella medrau llafaredd disgyblion yn golygu fod amrywiaeth o dasgau newydd yn bosibl wrth i ddisgyblion gyflwyno neu adolygu’u gwaith.

Ar y cychwyn cyntaf, edrychodd yr ysgol ar y model SAMR  (‘Substitution, Augmentation, Modification a Redefinition’) o fabwysiadu’r defnydd o dechnoleg ym Mro Edern. Dyma fodel effeithiol ar gyfer mabwysiadu gwaith digidol o fewn byd addysg.  Ym Mro Edern, mae’r R, sef Redefinition yn cael ei gyrraedd yn gyson wrth i’r staff ailddiffinio’r hyn sy’n bosibl iddynt ei gyflawni gyda disgyblion. Caiff y disgyblion brofiadau penodol wrth drin data, defnyddio taenlenni a graffiau addas wrth ddatrys hafaliadau. Mae dealltwriaeth gynyddol gadarn gan y disgyblion o wahanol fathau o raglenni codio er mwyn creu gweithgareddau amrywiol.  Enghraifft yng nghyfnod allweddol 3 yw defnyddio rhaglenni cyfrifiadurol er mwyn hybu medrau rhif. Maent yn creu rhaglen peiriant arwynebedd gan ddefnyddio meddalwedd addas yn ogystal â chreu peiriant mathemateg o fewn taenlen er mwyn datrys hafaliadau. Gwelir penllanw’r gwaith yng ngwaith Bac blwyddyn 11 wrth i’r disgyblion drin a chyflwyno data yn eu prosiectau unigol.

O ran mabwysiadu’r Fframwaith Cymhwysedd Digidol, mae disgyblion Bro Edern yn cael llu o brofiadau amrywiol yn eu gwersi, gan gynnwys creu fideos hyrwyddo ar gyfer y Gwasanaeth Iechyd mewn gwersi gwyddoniaeth, maent yn anfon fideos Almaeneg sy’n hysbysebu Caerdydd i’w partneriaid cyfnewid yn yr Almaen ac mewn gwersi Cymraeg maent wedi bod yn creu rhaglenni dogfen am foddi Tryweryn. Mewn gwersi daearyddiaeth mae dosbarthiadau wedi cydweithio ar un ddogfen ganolog, yn cyd-gynllunio taith i’r Eidal. Wrth fabwysiadu’r llinynnau dinasyddiaeth sy’n sôn am ddiogelwch, hunaniaeth, enw da a seibr fwlio, bu’r ysgol yn ffodus iawn o’r plismon cymunedol, sy’n ymweld yn gyson er mwyn helpu i drosglwyddo negeseuon pwysig i ddisgyblion a’u rhieni.

Sut ydych chi wedi mynd ati i rannu eich arfer dda?

Fel Ysgol Arloesi Digidol, mae Ysgol Bro Edern yn cydweithio gyda’r consortiwm a’r llywodraeth er mwyn rhoi’r Fframwaith Cymhwysedd Digidol ar waith. Croesawyd yr holl arloeswyr digidol i Fro Edern er mwyn iddynt arsylwi gwersi a thrafod arfer dda. Mae’r ysgol yn darparu cyrsiau hyfforddi ar wahanol agweddau ar y Fframwaith Cymhwysedd Digidol drwy’r consortiwm ar gyfer ysgolion cyfrwng Saesneg a thrwy Gyda’n Gilydd (rhwydwaith datblygiad proffesiynol ysgolion cyfrwng Cymraeg Consortiwm Canolbarth y De) ar gyfer ysgolion Cymraeg. Mae athrawon wedi cyflwyno mewn nifer o gyfarfodydd yng Nghymru a Lloegr ac mae’r ysgol wedi darparu sesiynau HMS i nifer o ysgolion eraill, gan gynnwys sesiynau ar godi hyder digidol staff a chynllunio ar gyfer dyfodiad y Fframwaith Cymhwysedd Digidol.

Math o Adnodd Gwella: Arfer effeithiol

Rhannu'r dudalen hon
 

Cyd-destun a chefndir yr arfer effeithiol neu arloesol

Mae’r ysgol uwch yn cynnwys nifer sylweddol o ddisgyblion â Saesneg fel iaith ychwanegol (SIY).  Daw tuag 20% o ddisgyblion o gefndiroedd ethnig lleiafrifol ac mae tua 25% yn cael cymorth ar gyfer dysgu Saesneg fel iaith ychwanegol.  I sicrhau bod ethos yr ysgol wedi gwreiddio a bod disgyblion yn gwneud cynnydd cryf, mae eu hyder a’u cymhwysedd mewn Saesneg o’r pwys mwyaf.

Disgrifiad o natur y strategaeth neu’r gweithgaredd

Mae gan yr ysgol un flaenoriaeth, sef defnyddio cymaint â phosibl o strategaethau wedi’u cynllunio’n dda i flaenoriaethu ymdrochi a chynnwys disgyblion â SIY yn llwyr yng nghymuned yr ysgol.  Cyflawnir hyn trwy sicrhau eu bod yn datblygu eu medrau siarad, darllen ac ysgrifennu Saesneg yn gymwys ac yn hyderus ar bob adeg.

Mae’r broses yn dechrau trwy asesu cefndir a hyfedredd Saesneg disgyblion cyn eu derbyn.  Mae hyn yn caniatáu i’r ysgol ddosbarthu geirfaon pwnc unigol, cymorth ac arweiniad cyn derbyn.  Mae llawer o ddisgyblion yn ymrestru am sawl wythnos yn ystod tymor yr haf cyn eu dyddiad dechrau arfaethedig a/neu yn cymryd rhan yn yr ysgol haf i ddisgyblion SIY.  Mae’r cyfuniad hwn o asesu a chymorth yn hysbysu staff yn fwy cywir ac mae’n paratoi disgyblion yn fwy effeithiol cyn iddynt ddechrau eu haddysg yn yr ysgol.  Mae tiwtoriaid dosbarth neilltuedig yn cyfathrebu â’r teulu cyn ac yn ystod derbyn, a chaiff disgybl-llysgenhadon penodol eu neilltuo i helpu’u cymheiriaid pan fyddant yn cyrraedd.  Pan fydd disgyblion yn dechrau yn yr ysgol, rhoddir gwersi cymorth SIY personoledig ar waith a bydd nifer y gwersi hyn yn amrywio rhwng dwy a deg yr wythnos, yn dibynnu ar lefel hyfedredd iaith y disgybl.  Mae siarad Saesneg yn orfodol yn yr ysgol ac yn y llety.  Mae athrawon yn hybu lefelau uchel o gynhwysiant disgyblion ac yn eu hannog i gymryd rhan mewn gweithgareddau, fel gwasanaethau boreol, digwyddiadau elusennol, diwrnod rhyngwladol a gwersi siarad cyhoeddus.  Mae’r cyfleoedd hyn yn annog disgyblion i ddatblygu eu llafaredd mewn amgylchedd cefnogol ac anogol.  Mae clybiau ar ôl ysgol yn annog rhyngweithio â’u cymheiriaid y tu allan i’r diwrnod ysgol, sy’n annog disgyblion ymhellach i ddatblygu’u medrau llafaredd.  Mae addysgu ieithoedd ychwanegol, fel Lladin, yn ffordd ychwanegol o gynorthwyo disgyblion â SIY â’u dealltwriaeth o amseroedd y ferf ac i ddatblygu geirfa.

Pa effaith y mae’r gwaith hwn wedi’i chael ar ddarpariaeth a safonau dysgwyr?

Mae disgyblion â SIY yn dod yn hyderus ar lafar yn gyflym, mewn gwersi a thu hwnt.  Nid yw canlyniadau disgyblion â SIY mewn asesiadau yn wahanol i ganlyniadau disgyblion sy’n siarad Saesneg mamiaith; yn wir, maent yn well yn aml.  Er bod yr ysgol yn cynnig TGAU SIY, mae llawer o ddisgyblion â SIY yn sefyll TGAU Saesneg, iaith a llenyddiaeth, ac yn ennill graddau A*/A.  Yn Niploma’r Fagloriaeth Ryngwladol, caiff disgyblion â SIY ddewis astudio Saesneg mamiaith neu ail iaith ac mae llawer yn dewis y cyntaf (ac yn rhagori ynddo).  Yn olaf, y mwyaf o ieithoedd mae disgyblion yn eu hastudio, y mwyaf hyfedr yn Saesneg yr ymddengys eu bod yn datblygu.  Cymaint yw hyder a chymhwysedd ymhlith disgyblion â SIY, fel eu bod yn llunio 40% o’r cyngor ysgol.

Sut rydych chi wedi rhannu’ch arfer dda?

Mae’r cwrs cyn y Fagloriaeth Ryngwladol a’i ffocws ar ddatblygu iaith wedi’i rannu gyda chydlynwyr eraill y Fagloriaeth Ryngwladol ac ysgolion eraill y Fagloriaeth Ryngwladol yn genedlaethol ac yn rhyngwladol.  Mae athrawon iaith rhan-amser yn rhannu syniadau a strategaethau’r ysgol gyda’r ysgolion eraill y maent yn addysgu ynddynt.

Math o Adnodd Gwella: Arfer effeithiol

Rhannu'r dudalen hon
 

Gwybodaeth am yr ysgol

Mae Ysgol Gynradd Llandrillo-yn-Rhos ar gyrion Bae Colwyn.  Ar hyn o bryd, mae tua 440 o ddisgyblion amser llawn a 30 o ddisgyblion rhan-amser rhwng tair ac un ar ddeg oed ar y gofrestr.  Mae tua 15% o ddisgyblion yn gymwys am brydau ysgol am ddim, ac mae gan yr un gyfran anghenion dysgu ychwanegol. 

Mae’r ysgol yn ysgol arloesi ar hyn o bryd, ac mae’n gweithio gyda Llywodraeth Cymru ac ysgolion eraill i fwrw ymlaen â datblygiadau yn gysylltiedig â dysgu proffesiynol.

Cyd-destun a chefndir yr arfer effeithiol

Rhoddwyd blaenoriaeth yng nghynllun gwella’r ysgol i wella darpariaeth a deilliannau ar gyfer disgyblion mwy abl a thalentog am y ddwy flynedd ddiwethaf.  Mae gan yr ysgol athro celf arbenigol a hyfforddwyd yn y sector uwchradd, sy’n arwain cyfranogiad yr ysgol yn y Cynllun Ysgolion Creadigol Arweiniol.  Yn 2016-2017, defnyddiodd yr ysgol gyllid o’r cynllun i wella medrau disgyblion mewn mathemateg weithdrefnol, gyda ffocws penodol ar herio disgyblion mwy abl a thalentog mewn cyd-destun dysgu creadigol.

Disgrifiad o’r gweithgarwch/strategaeth

Dros gyfnod o wyth wythnos, bu 60 o ddisgyblion Blwyddyn 5 yn cymryd rhan mewn prosiect creadigol am bum awr yr wythnos, dan arweiniad pedwar Ymarferwr Creadigol, athro celf yr ysgol ac athrawon dosbarth Blwyddyn 5.  Dyma oedd nodau’r prosiect:

  • datblygu medrau creadigol disgyblion trwy ddarparu cyfleoedd iddynt archwilio pum arfer greadigol y meddwl yn annibynnol, sef: dychymyg, chwilfrydedd, dyfalbarhad, cydweithrediad a disgyblaeth
  • datblygu medrau rhif, mesur a data disgyblion
  • cynorthwyo staff nad ydynt yn arbenigwyr i wella’u dealltwriaeth o addysgeg effeithiol mewn pynciau creadigol

Roedd arweinwyr hefyd yn awyddus i sicrhau bod y prosiect yn rhoi cyfle i ddisgyblion weithio’n annibynnol, hunangyfarwyddo’u dysgu a herio’r disgyblion mwy abl a thalentog hynny â medrau artistig a mathemategol mwy datblygedig. 

Ar ddechrau’r prosiect, bu grŵp o ddisgyblion mwy abl a thalentog yn ysgrifennu cwestiynau ac yn cyfweld â dau arlunydd gweledol a dau gerddor i sicrhau y byddent yn eu helpu i gyflawni nodau’r prosiect.  Gyda’i gilydd, bu’r Ymarferwyr Creadigol a’r athrawon yn cynllunio pedwar gweithdy rhagflas yn seiliedig ar arbenigedd yr ymarferwyr mewn celf a cherddoriaeth o amgylch thema ‘ditectifs patrwm’.  Yn y sesiynau, datblygodd disgyblion eu gwybodaeth am radiws, diamedr a chylchedd wrth iddynt ymchwilio i batrymau yn y byd naturiol, er enghraifft trwy ddŵr a sain.  Gwnaethant eu darluniau arsylwadol eu hunain o drawstoriad o fresychen, gan ddefnyddio siarcol a phastelau olew i archwilio llinell, patrwm a gwead.  Defnyddiodd yr Ymarferwyr Creadigol ddarluniau anatomegol Leonardo da Vinci o’r ‘Dyn Fitrwfaidd’ (1490) i gyflwyno disgyblion i’r cysyniad mathemategol o gymhareb a chyfran, y gwnaethant ymchwilio iddynt gan ddefnyddio eu cyrff i greu darluniau ar raddfa fawr.  Roedd hyn yn llwyddiannus iawn o ran ennyn diddordeb a herio disgyblion mwy abl, a aeth yn eu blaenau i archwilio cred da Vinci mai cydweddiadau ar gyfer gweithiau’r bydysawd yw cyfrannau’r corff dynol.  Fe wnaeth hyn sbarduno’u meddwl yn effeithiol iawn, gan eu hannog i ofyn cwestiynau lefel uchel a gwneud gwaith ymchwil annibynnol gartref.

Yn dilyn adolygiad o’r sesiynau rhagflas, cytunodd yr Ymarferwyr Creadigol a’r staff y dylid rhoi cyfle i ddisgyblion ddilyn eu diddordebau creadigol unigol a chael dewis rhydd ynglŷn â’r pwnc, y technegau a’r offer y byddent yn eu harchwilio o fewn y thema ‘ditectifs patrwm’ ar gyfer gweddill y prosiect.  Gyda’i gilydd, fe wnaethant gynllunio cydbwysedd gofalus o archwilio creadigol a datblygu medrau rhifedd, sydd wedi’u hanelu ar lefel briodol i fodloni anghenion disgyblion unigol, gan gynnwys y disgyblion mwy abl a thalentog.  Bu’r arbenigwyr yn gweithio’n llwyddiannus gyda disgyblion yn unigol ac mewn grwpiau bach i ddatblygu eu medrau, er enghraifft gan ddefnyddio cymwysiadau cyfrifiadur llechen i greu cyfansoddiadau cerddorol a deunyddiau diwydiannol fel pibau metel i greu cafn marmor yn dilyn eu hymchwiliadau o ‘lif’. 

Bob wythnos, bu athrawon a’r Ymarferwyr Creadigol yn myfyrio ar y prosiect gyda’i gilydd, yn rhoi adborth i’w gilydd ac yn adolygu cynnydd.  Dros yr wyth wythnos, sylwodd staff ar welliannau sylweddol yng ngallu disgyblion i weithio mewn timau amrywiol, trafod rolau a gwneud penderfyniadau fel sut i drefnu pob sesiwn, a gyda phwy i weithio.  Sylwodd athrawon fod disgyblion mwy abl a thalentog yn aml yn dewis gweithio gyda disgyblion ag anghenion dysgu ychwanegol, gan eu bod yn cydnabod bod ganddynt rinweddau, fel gwydnwch a dyfalbarhad, a oedd o fudd mawr wrth fentro a datrys problemau.  Yn yr un modd, roedd disgyblion llai abl yn croesawu’r cymorth gan eu cyfoedion, er enghraifft i ganfod yr onglau sydd eu hangen i greu cafn marmor effeithiol dros bellter hir ar y maes chwarae. 

Ar ddiwedd y prosiect, cynhaliodd yr ysgol ddigwyddiad rhannu ar gyfer yr holl ddosbarthiadau, rhieni a llywodraethwyr.  Dewisodd y disgyblion arddangos eu dysgu trwy stondin farchnad carwsél, lle roeddent yn rhannu eu gwaith ac yn darparu gweithgareddau creadigol byr ar gyfer pob grŵp o westeion.

Effaith ar ddarpariaeth a safonau

Gofynnodd athrawon i bob disgybl gwblhau olwyn ‘arferion creadigol y meddwl’ ar ddechrau a diwedd y prosiect.  Gyda’i gilydd, roedd staff a disgyblion yn defnyddio’r graff pry cop i siarad am gynnydd disgyblion o ran datblygu dychymyg, dyfalbarhad, cydweithrediad, disgyblaeth a chwilfrydedd yn ystod y prosiect.  Er enghraifft, bu bechgyn mwy abl yn siarad yn fywiog am y modd y gwnaethant ymchwilio i’r berthynas rhwng cymarebau yn y corff dynol a’r rheiny yn y bydysawd, a oedd o ddiddordeb mawr iddynt, o ganlyniad i’r sesiwn ar gymhareb a chyfran.  Fe wnaeth disgyblion mwy abl a thalentog elwa’n fawr ar gymryd rhan mewn sgyrsiau dysgu gydag arbenigwyr a oedd yn herio’u meddwl creadigol a mathemategol.

Yn sgil y cyfle i gyflwyno ac esbonio eu gwaith i ddisgyblion eraill, er enghraifft yn y dosbarth meithrin, ac i rieni, datblygwyd gallu’r disgyblion Blwyddyn 5 i addasu’r ffordd y maent yn siarad ar gyfer gwahanol gynulleidfaoedd yn eithriadol o dda.  Er enghraifft, buon nhw’n gweithio gyda’i gilydd yn llwyddiannus i ddewis gwahanol enghreifftiau i ddangos eu hesboniadau a’u disgrifiadau o’u gwaith creadigol, yn dibynnu ar oedran y gwrandäwr.

Asesodd athrawon ddealltwriaeth disgyblion o gysyniadau mathemategol, y canolbwyntiwyd arnynt yn y prosiect, fel rhan o drefn arferol yr ysgol o gynnal asesiadau bob hanner tymor, cyn dechrau’r prosiect, ac ar ddiwedd yr wyth wythnos.  Nododd athrawon fod gwelliant cryf yng nghyrhaeddiad y rhan fwyaf o ddisgyblion Blwyddyn 5 mewn datrys problemau, mesur, cyfrifo arwynebedd a pherimedr, onglau a dehongli siartiau a graffiau bar.  Datblygodd disgyblion mwy abl eu dealltwriaeth o gymhareb a chyfran i lefel uchel.  At ei gilydd, cafodd y prosiect effaith gadarnhaol ar wella ymgysylltiad disgyblion mewn gwersi mathemateg, oherwydd gallent weld cysylltiad uniongyrchol â’u gwaith prosiect creadigol a pherthnasedd eu medrau rhifedd mewn cyd-destun ymarferol.

Roedd disgyblion mwy abl yn gwerthfawrogi’r ymreolaeth, y cyfle i fentro’n greadigol ac ehangder y profiadau ysgogol a ddarparwyd gan y prosiect.  Roedd staff nad oeddent yn arbenigwyr yn eu maes yn elwa ar weithio ochr yn ochr â’r Ymarferwyr Creadigol ac athro celf yr ysgol.  Er enghraifft, maent wedi mabwysiadu dulliau mwy creadigol yn eu haddysgu ac yn teimlo’n fwy hyderus yn caniatáu i ddisgyblion arwain eu dysgu eu hunain ar draws y cwricwlwm.

Math o Adnodd Gwella: Arfer effeithiol

Rhannu'r dudalen hon
 

Cyd-destun a chefndir yr arfer arloesol

Mae Ysgol Olchfa wedi bod yn Ysgol Arloesi’r Cwricwlwm er Tachwedd 2015 ac fe lansiodd ei chwricwlwm arloesol, ‘iLearn’, ym Medi 2016.

Roedd yr ysgol wedi bod yn adolygu’i darpariaeth yng nghyfnod allweddol 3 am nifer o flynyddoedd cyn hyn a defnyddiodd ei statws arloesi i archwilio posibiliadau newydd, yn enwedig yn gysylltiedig â grwpio pynciau ‘traddodiadol’.

Disgrifiad o’r arfer arloesol

Cwricwlwm iLearn yw ymateb yr ysgol i adroddiad ‘Dyfodol Llwyddiannus’ yr Athro Donaldson.  Mae’r chwe Maes Dysgu a Phrofiad canlynol wedi’u mabwysiadu:

  • iCommunicate (Iaith a Chyfathrebu)
  • iCalculate (Mathemateg, Rhifedd, Cyfrifiadura a TG)
  • iDiscover (Gwyddoniaeth a Thechnoleg)
  • iThink (Y Dyniaethau)
  • iCreate (Y Celfyddydau Mynegiannol)
  • iThrive (Iechyd, Llesiant a Chyfoethogi)

Caiff rheolwyr dysgu gyfrifoldeb am lunio cynlluniau gwaith sy’n canolbwyntio ar ddatblygu’r pedwar diben yn ôl ‘Dyfodol Llwyddiannus’.  Mae athrawon yn cymryd rhan mewn cynllunio ac arfarnu cydweithredol.  O ganlyniad, mae’r cwricwlwm newydd yn ceisio gwneud y mwyaf o’r hyn y mae’r Athro Donaldson yn ei alw’n ‘ddilysrwydd cyffredin’ rhwng ac ar draws Meysydd Dysgu.  Heb eu cyfyngu gan yr angen i dalu sylw i’r Cwricwlwm Cenedlaethol, mae gan wersi gyd-destunau bywyd go iawn ac maent yn caniatáu i athrawon herio a datblygu dealltwriaeth ddyfnach disgyblion.

Neilltuwyd amser cynllunio a pharatoi sylweddol yn ystod tymor yr haf 2016, i ganiatáu am lansio iLearn i ddisgyblion Blwyddyn 7 ym Medi 2016.  Yn sgil cyflwyniadau dilynol, ym Medi 2018, bydd pob disgybl yng nghyfnod allweddol 3 yn dilyn cwricwlwm iLearn.

O Fedi 2017 ymlaen, mae’r ysgol wedi sefydlu tîm ymchwil, yn cynnwys 5 athro-ymchwilydd.  Mae’r ymchwilwyr hyn yn addysgu am hanner yr amserlen ac yn defnyddio gweddill eu hamser i wneud ymchwil manwl a pherthnasol er mwyn llywio arferion addysgu a dysgu’r ysgol.  Un o brif swyddogaethau’r tîm yw ei fod yn parhau i gynnal arfarniad parhaus o’r cwricwlwm newydd ac addysgeg gysylltiedig.

Yr effaith ar y ddarpariaeth a safonau disgyblion

Megis dechrau datblygu mae’r cwricwlwm newydd o hyd.  Fodd bynnag, yn ôl canfyddiadau cynnar y tîm ymchwil, mae’r disgyblion yn cyflawni safonau uchel yn eu llefaredd, eu galluoedd datrys problemau a’u meddwl beirniadol.  Mae disgyblion yn ddysgwyr uchelgeisiol a hyderus, yn gyflym i ofyn cwestiynau perthnasol ac ymhél â’r pwnc.  At hynny, mae creadigrwydd a gwreiddioldeb disgyblion wedi cynyddu, maent yn gweithio’n llwyddiannus ar y cyd ag eraill ac yn cymryd risgiau pwyllog.  Fwyfwy, mae disgyblion yn cymhwyso’u medrau llythrennedd a rhifedd mewn cyd-destunau anghyfarwydd ac yn adnabod y cysylltiadau rhwng eu profiadau dysgu.

Mae’r tîm ymchwil wedi canfod bod y cwricwlwm yn ddiddorol, yn berthnasol ac yn heriol.  Mae wedi cyfoethogi profiad y disgyblion ac wedi ymestyn perchenogaeth ar ddysgu.  Hefyd, mae wedi ysgogi ymagwedd addysgol sy’n cwmpasu ‘deuddeg egwyddor’ yr Athro Donaldson.  Oherwydd bod y cwricwlwm newydd yn rhoi mwy o hyblygrwydd a dewis, mae hyn wedi ymrymuso athrawon a disgyblion.  Mae’r defnydd ar lais y disgybl yn y broses adolygu yn sicrhau bod y cwricwlwm yn parhau’n ddynamig ac yn egnïol.

At hynny, mae’r tîm ymchwil wedi amlygu meysydd y mae angen eu datblygu.  Mae’r rhain yn cynnwys yr angen i addysgu medrau gwaith grŵp yn benodol a sut i asesu cynnydd yn erbyn y pedwar diben.  Yn hynny o beth, mae’r tîm yn chwarae rhan hanfodol yn ymdrechion yr ysgol i barhau i wella’i darpariaeth yng nghyfnod allweddol 3.

Sut rydych chi wedi rhannu’ch arfer dda?

Fel Ysgol Arloesi, mae Olchfa wedi derbyn bron 20 o ymweliadau gan ysgolion a phartïon eraill â diddordeb.  Hefyd, mae’r ysgol wedi cymryd rhan mewn nifer o gynadleddau cenedlaethol a lleol, ac wedi rhoi cyflwyniadau i Lywodraeth Cymru, consortia lleol, yr awdurdod lleol a darparwyr addysg uwch.

Math o Adnodd Gwella: Arfer effeithiol

Rhannu'r dudalen hon
 

Cyd-destun a chefndir yr arfer effeithiol neu arloesol

Yn 2012, enwyd Ysgol Gynradd Tre Ioan yn ysgol gynradd beilot ar gyfer awdurdod lleol Sir Gâr, er mwyn treialu llwyfan dysgu ar-lein newydd i Gymru.  Yn dilyn hynny, gyda chytundeb y corff llywodraethol, sefydlodd yr ysgol ddwy ystafell ddosbarth TGCh enghreifftiol ar gyfer archwilio’r effaith y byddai mwy o weithredu digidol yn ei chael ar alluogi disgyblion i ennill mwy o fedrau a hwyluso dysgu ar draws y cwricwlwm.  Pe byddent yn llwyddiannus, gallai’r ystafelloedd dosbarth enghreifftiol hyn gael eu defnyddio wedyn yn ganolfannau i gydweithwyr rannu syniadau ac archwilio llifoedd gwaith digidol arloesol trwy fodelau tiwtora cymheiriaid.

O’r craffu cychwynnol ar y prosiect peilot, daeth i’r amlwg bod y cyfle i ddarparu profiadau cyfoethog a chreadigol i ddisgyblion wedi gwella ymgysylltiad a meithrin hyder i archwilio syniadau a themâu mewn ffyrdd mwy creadigol.  Fe wnaeth y potensial am gydweithredu, gan ddefnyddio amrywiaeth o gyfryngau mewn amgylchedd ar-lein, helpu i feithrin hyder disgyblion, a helpu hefyd i leihau’r gwahaniaeth rhwng cyflawniad bechgyn a merched.  Er mwyn harneisio manteision posibl y llwyfan dysgu ar-lein a oedd ar gael, datblygodd arweinwyr yr ysgol gynllun gweithredu strategol 5 mlynedd i wella’r ddarpariaeth a’r gallu i ddefnyddio adnoddau digidol ar draws yr ysgol yn raddol.

Yn sgil cyhoeddi adroddiad ‘Dyfodol Llwyddiannus’ ar y cwricwlwm newydd i Gymru yn ddiweddarach, rhoddwyd yr ysgol mewn sefyllfa fuddiol i barhau i ddatblygu rhaglen astudio greadigol ac arloesol a fyddai’n llwyddo i ennyn diddordeb yr holl ddisgyblion a, hefyd, fynd i’r afael â phedwar diben y cwricwlwm newydd.  Cynigiodd arweinwyr yr ysgol raglenni hyfforddiant a chymorth i staff, a oedd yn eu symbylu i dreialu syniadau newydd er mwyn meithrin cymwyseddau digidol yn eu dosbarthiadau eu hunain.  O ganlyniad, mae staff yr ysgol bellach yn cynllunio gweithgareddau trawsgwricwlaidd pwrpasol sy’n ategu medrau llythrennedd, rhifedd, TGCh a digidol disgyblion o fewn cwricwlwm eang a chytbwys.

Disgrifiad o natur y strategaeth neu’r gweithgaredd

Mae Ysgol Gynradd Tre Ioan wedi parhau i ddefnyddio’i mecanweithiau digidol helaeth i ymgorffori medrau digidol yn llwyddiannus ar draws cwricwlwm eang, sy’n cydbwyso gwaith digidol ac ysgrifenedig yn briodol.  O ganlyniad, gall disgyblion ymgymryd yn gynyddol â thasgau digidol pwrpasol sy’n ategu ac yn gwella’u dysgu, gan gydnabod y manteision sy’n rhan o gwblhau gwaith yn ddigidol.  Yn ei hanfod, nod y cwricwlwm a ddatblygwyd dros nifer o flynyddoedd yw mabwysiadu mecanweithiau digidol fel cyfrwng i annog amrywiaeth o fedrau trawsgwricwlaidd. 

Caiff disgyblion gyfleoedd buddiol i drosglwyddo cymwyseddau digidol ar draws amrywiaeth o galedwedd, fel cyfrifiaduron pen desg, llechi a dyfeisiau eraill, er mwyn cael at amrywiaeth ehangach o adnoddau dysgu ar-lein trwy lwyfan dysgu Hwb.  Trwy ddefnyddio Llwyfan Dysgu Cymru Gyfan, caiff y disgyblion eu hannog i ddefnyddio amrywiaeth o ddyfeisiau i gyfuno amrywiaeth o elfennau digidol a gwella’u hyfedredd ym maes cyfrifiadura cwmwl.  Mae defnyddio dyfeisiau symudol yn caniatáu i ddisgyblion gipio delweddau, sain a fideo heb gymorth, gyda’r cyfryngau sydd wedi’u cipio yn cael eu cadw’n awtomatig yn storfa ffeiliau ar-lein y disgyblion.  O ganlyniad, mae disgyblion wedi gallu rhannu, cydweithredu a storio’u gwaith digidol mewn lleoliad ar-lein canolog, o unrhyw ddyfais a all gysylltu.  Mae hyn wedi cyflymu llifoedd gwaith, gyda’r dechnoleg yn cael ei defnyddio’n bwrpasol i ategu caffael medrau ar draws y cwricwlwm a darparu tystiolaeth o hynny.  Mae’r broses o gipio cyfryngau digidol fel hyn wedi hwyluso datblygiad medrau llythrennedd, rhifedd a digidol disgyblion.  Mae disgyblion wedi cael eu grymuso i gasglu elfennau amlgyfrwng yn annibynnol, sy’n cyfoethogi’u gwaith ac yn ei wneud yn fwyfwy rhyngweithiol a chreadigol.  Mae’r gwaith hwn yn ymddangos ochr yn ochr â gwaith ysgrifenedig mewn llyfrau disgyblion a gellir cael ato drwy godau ‘QR’. 

Mae blog dysgu ar-lein yr ysgol, ‘The Johnstown Journal’, yn un enghraifft o’r dull digidol aml-fedr hwn.  Mae disgyblion ym Mlwyddyn 6 sy’n gymwys ar gyfer prydau ysgol am ddim a’r disgyblion mae’r ysgol yn eu henwi’n fwy abl a thalentog yn cydweithio â’i gilydd.  Maent yn mabwysiadu rôl ‘Johnstown Journalists’, ac yn cymryd cyfrifoldeb am olygu a dilysu eu blogiau sydd mewn arddull papur newydd, cyn eu cyhoeddi i gymuned ehangach yr ysgol drwy wefan yr ysgol.  O ganlyniad, mae hyn wedi galluogi’r ysgol i gyfleu cyfoeth o brofiadau dysgu i’w chynulleidfa o ddisgyblion, rhieni a llywodraethwyr, sy’n gallu gweld ac ychwanegu sylwadau sy’n cael eu cymedroli.  Mae pob rhifyn newydd o’r blog yn adlewyrchu newyddion a digwyddiadau diweddar yr ysgol.  Ym mhob grŵp blwyddyn, mae disgyblion yn creu’r holl elfennau digidol ac yn casglu’r erthyglau ysgrifenedig yn ynghyd.  O dan stiwardiaeth eu hathrawon ac arweiniad medrus ‘newyddiadurwyr’ Blwyddyn 6, mae disgyblion yn cydweithio i greu’r erthyglau a chipio’r elfennau amlgyfrwng y mae eu hangen i hoelio sylw’r gynulleidfa fwriadedig a bodloni anghenion pob blog unigol.  Derbyniodd y prosiect llwyddiannus hwn wobr genedlaethol am y ‘Prosiect Digidol Gorau’ yn nigwyddiad Dysgu Digidol Cenedlaethol 2016 yn Llandudno.

At hynny, dyfarnwyd gwobr ddigidol genedlaethol ychwanegol i grŵp o ddisgyblion cyfnod allweddol 2 yn 2017.  Fe wnaeth y disgyblion mwy abl a thalentog hyn gydweithio â’i gilydd, gan ddefnyddio medrau meddwl a rhifedd uwch i gynhyrchu algorithmau codio blog i animeiddio cerdd, fel rhan o gystadleuaeth genedlaethol a sefydlwyd gan Brifysgol Aberystwyth. 

Yn y pen draw, mae cymwyseddau digidol wedi dod yn rhan annatod o lifoedd gwaith dysgu yn yr ysgol.  Mae cyfleoedd i harneisio medrau disgyblion trwy sefydlu cysylltiadau pellach â’r gymuned wedi bod yn fuddiol i holl randdeiliaid yr ysgol hefyd.  Er enghraifft, mae disgyblion cyfnod allweddol 2 wedi cael cryn fwynhad o’r profiad o wneud prosiect rhwng y cenhedloedd i sefydlu llyfr rhyngweithiol, yn darlunio bywyd ysgol yn ystod y 1950au, dan ddefnyddio technegau ‘sgrin werdd’ i gyfweld â chyn-ddisgyblion.  Trwy wneud hyn, mae’r disgyblion wedi profi a rhannu medrau newydd gyda’r henoed ac wedi llunio partneriaethau cryf ag aelodau o’r gymuned.

Pa effaith y mae’r gwaith hwn wedi’i chael ar ddarpariaeth a safonau dysgwyr?

Yn ystod cyfnod rhoi cynllun gweithredu strategol yr ysgol ar waith, mae bron pob un o’r disgyblion wedi gwneud cynnydd da o leiaf wrth gaffael medrau digidol ar draws y cwricwlwm.  Mae hyn hefyd wedi cael effaith gadarnhaol ar wella’u medrau llythrennedd a rhifedd a gwella’u hyder.  Erbyn hyn, mae disgyblion yn yr ysgol yn wybodus ac yn ymddiddori yn eu profiadau dysgu, ac mae’r rhan fwyaf ohonynt yn gallu llunio barnau priodol ac annibynnol ynghylch pryd i fabwysiadu prosesau digidol ar gyfer tasgau er mwyn ymestyn eu dysgu.  Mae’n amlwg bod prosiectau sydd wedi targedu grwpiau o ddisgyblion wedi lleihau’r gwahaniaeth rhwng perfformiad bechgyn a merched a disgyblion o gefndiroedd difreintiedig.  Hefyd, mae’r prosiectau hyn wedi meithrin ethos o ddysgu cydweithredol, gan wella cynhwysiant a medrau allweddol disgyblion ym meysydd TGCh, rhifedd, llythrennedd a medrau meddwl.

Sut rydych chi wedi rhannu’ch arfer dda?

Mae’r cryfderau ym maes dysgu digidol yn parhau i gael eu cydnabod yn genedlaethol ac ar draws consortiwm rhanbarthol ERW.  O ganlyniad, dyfarnwyd statws ‘ysgol arweiniol ddigidol’ i’r ysgol ar gyfer y rhanbarth.  Mae hyn yn golygu y gall disgyblion ac athrawon Ysgol Gynradd Tre Ioan gynnig cymorth rhwng ysgolion, trwy agor ei drysau i ysgolion eraill sydd wedi bod yn awyddus i ddysgu o’r model dysgu digidol.  Mae’r ysgol yn cydnabod cymorth a chefnogaeth ei chorff llywodraethol, sydd wedi mynd ati i gymeradwyo systemau dysgu digidol ac sydd wedi gweithio mewn partneriaeth â’r ysgol i feithrin ethos o fedrau gydol oes sy’n berthnasol i ddysgwyr yr 21ain ganrif. 

Math o Adnodd Gwella: Arfer effeithiol

Rhannu'r dudalen hon
 

Cyd-destun a chefndir i’r arfer effeithiol neu arloesol :

Mae’r ysgol yn rhoi pwyslais uchel ar les a sicrwydd emosiynol, gan ystyried teimladau disgyblion trwy’r ysgol yn ddyddiol ac ymateb i unrhyw bryderon yn syth.  Er mwyn codi safonau ymddygiad ar draws yr ysgol a gwella sgiliau canolbwyntio, arsylwyd ar arfer dda o ran ioga mewn ysgol gynradd yn Sir Abertawe.  Yn sgil yr ymweliad hwn, trefnwyd hyfforddiant un diwrnod i ddisgyblion, staff, llywodraethwyr a rhieni ynglŷn â ioga.  Ariannwyd y prosiect trwy grant.

Disgrifiad o natur y strategaeth neu’r gweithgaredd

Cynhelir sesiynau ioga trwy gydol yr ysgol ar wahanol adegau o’r dydd i hybu safonau meddylgarwch disgyblion a staff.  Mae’n helpu gwella sgiliau canolbwyntio, magu gwydnwch ac annog disgyblion i ymgysylltu â dysgu, gan ychwanegu gwerth at raglenni addysg sy’n bodoli eisoes.  Mae’r sgiliau trosglwyddadwy hyn yr un mor effeithiol gartref ag yn yr ysgol.

Pa effaith y mae’r gwaith hwn wedi’i chael ar ddarpariaeth a safonau dysgwyr?

Mae’r gwaith hwn wedi codi safonau lles y staff a’r disgyblion, ac wedi codi safonau ymddygiad trwy gydol yr ysgol.  Mae’r disgyblion yn tawelu ar ôl y sesiynau ioga, yn ffocysu’n well yn ystod gwersi ac yn ymwybodol o sut i ymlacio.  Mae’r gwaith hwn wedi cael effaith gwerthfawr, gan ysbrydoli disgyblion i fod yn unigolion iach, hyderus. 

Sut ydych chi wedi mynd ati i rannu eich arfer dda?

Rhennir arfer dda gyda rhieni, llywodraethwyr a’r gymuned leol drwy gyfrwng cymdeithasol yr ysgol. Bu S4C yn ffilmio’r arfer dda ioga ar gyfer y rhaglen HENO a gafodd ei darlledu ar draws Cymru gyfan.  Yn sgîl y rhaglen hon, mae staff o ysgolion cynradd eraill yng Nghymru wedi ymweld â’r ysgol i arsylwi ar arfer dda o ran lles.  Yn ddiweddar, buodd Comisiynydd Plant Mrs. Sally Holland yn ymweld â’r ysgol i arsylwi ar y ddarpariaeth.  Buodd yn canmol yr ysgol am fynd ati’n annibynnol i ddatblygu sgiliau lles o safon uchel, heb ddilyn unrhyw gynllun masnachol.  O ganlyniad, mae hi wedi gwahodd yr ysgol i gyflawni tasg arbennig i arolygu profiadau disgyblion o ran lles, mewn ffurf adroddiad wedi’i bersonoleiddio i Ysgol Gymraeg Brynsierfel.  Y bwriad fydd i’r ysgol ddefnyddio’r adroddiad i lywio agweddau at lesiant, gofal, cefnogaeth ac arweiniad disgyblion.  Mae’r arolwg wedi’i seilio ar Fframwaith Hawliau Plant y Comisiynydd.  Bydd y Comisiynydd Plant yn defnyddio’r  data, heb enwau, i ganfod arfer dda yng Nghymru a hefyd nodi themâu ar draws Cymru a fydd yn helpu i gefnogi ysgolion.  Bydd y wybodaeth hon hefyd yn helpu i lywio blaenoriaethau’r Comisiynydd Plant ar gyfer plant a phobl ifanc fel rhan o ymgynghoriad cenedlaethol ‘Beth Nawr?’

Math o Adnodd Gwella: Arfer effeithiol

Rhannu'r dudalen hon
 

Cyd-destun a chefndir i’r arfer effeithiol neu arloesol

Mae’r ysgol wedi cynnal diwylliant ac ethos sy’n rhoi llais y disgybl wrth wraidd gwella’r ysgol.  Mae hyn wedi’i ymgorffori’n gadarn ac mae’n cael effaith sylweddol ar les disgyblion a safonau addysgu a dysgu.

Yn unol â chenhadaeth yr ysgol i ‘Gyffroi, Herio a Grymuso’ (Excite, Challenge and Empower), mae disgyblion ac athrawon yn cydweithio â’i gilydd yn effeithiol iawn i sbarduno prosesau gwella ysgol ar bob lefel.  Mae diwylliant yr ysgol wedi’i adeiladu ar rymuso disgyblion i fod yn arweinwyr eu dysgu eu hunain.  Yr amcan sylfaenol yw ennyn a thanio ymgysylltiad disgyblion trwy arloesi’r cwricwlwm.

Disgrifiad o natur y strategaeth neu’r gweithgaredd

Mae cynllun ‘Skills learnt Holistically to Inspire, Nurture and Empower’ (SHINE), a lansiwyd ym Medi 2015, yn gwricwlwm cynhwysol wedi’i arwain gan ddysgwyr sy’n cyffroi, herio a grymuso pob dysgwr.  Mae hyn wedi esblygu trwy ddysgu proffesiynol wedi’i arwain gan ymchwil, ac ymgysylltiad â chwricwlwm Dyfodol Llwyddiannus, i adlewyrchu rôl Ysgol Glan Usk fel ysgol arloesi i fwrw ymlaen â datblygiadau sy’n ymwneud â’r cwricwlwm.

I lansio thema newydd dan arweiniad disgyblion, mae athrawon yn hwyluso diwrnod trochi i ddisgyblion sy’n cynnwys gweithgareddau dysgu cyfoethog.  Wrth gael eu trochi mewn gweithgareddau hynod greadigol, caiff disgyblion amser i fyfyrio a chynllunio cyfeiriad dysgu yn y dyfodol.  Mae athrawon yn sicrhau bod y cwricwlwm yn adeiladu’n systematig ar wybodaeth a dealltwriaeth flaenorol disgyblion trwy fframwaith blaengar a chynhwysfawr o fedrau.  Mae disgyblion yn penderfynu ar y thema a, chan ddefnyddio medrau, yn adeiladu’r cyd-destun ar gyfer dysgu.  Caiff disgyblion eu grymuso’n ddyddiol trwy fewnbwn uniongyrchol ac ystyrlon i’w profiadau dysgu.  Mae pedwar diben y cwricwlwm newydd i Gymru yn rhan annatod o’r broses gynllunio a dysgu disgyblion.  Mae pob ystafell ddosbarth yn cynnwys Wal Ddysgu i ddisgyblion, sy’n cynnwys cynlluniau a medrau disgyblion a’u syniadau ar gyfer gwersi.  Caiff gwersi cynlluniedig disgyblion eu hamlygu’n ddyddiol a’u harddangos yn glir i bawb eu gweld.

Mae gwybodaeth a dealltwriaeth disgyblion o gwricwlwm Dyfodol Llwyddiannus (y cwricwlwm newydd i Gymru) yn rhagorol.  Mae ‘cynulliadau cwricwlwm’ rheolaidd a dyddiau llais y disgybl yn galluogi pob dysgwr i gynllunio a myfyrio ar syniadau arloesol.  Mae’r Tîm Arweinyddiaeth Disgyblion yn rhoi adborth o’r digwyddiadau hyn i dîm arweinyddiaeth yr ysgol, a chaiff syniadau eu hintegreiddio ymhellach i’r cwricwlwm.

Caiff pob profiad dysgu ei wella trwy strategaethau metawybyddol a dulliau dysgu personol wedi’u teilwra.  Caiff disgyblion eu cynnwys mewn creu adnoddau a chyflwyno gwersi ar draws yr ysgol er mwyn ymgorffori strategaethau. 

Wrth arwain arloesi’r cwricwlwm,  mae diwylliant yr ysgol yn canolbwyntio ar ddysgu proffesiynol parhaus, deialog broffesiynol ac arfer fyfyriol.

Pa effaith y mae’r gwaith hwn wedi’i chael ar ddarpariaeth a safonau dysgwyr?

Mae cwricwlwm SHINE yn grymuso dysgwyr i arwain eu dysgu eu hunain.  Mae dealltwriaeth a chynllunio i ddatblygu medrau yn rhagorol.  Mae gan ddysgwyr ddealltwriaeth ragorol o gwricwlwm Dyfodol Llwyddiannus a’r pedwar diben sydd ynddo.  Mae gan bob plentyn lais sylweddol o ran ffurfio’r cwricwlwm, ac maent yn ddinasyddion gweithredol sy’n gwybod bod eu cyfraniadau’n cael eu gwerthfawrogi.  Mae arolwg lles yn rhoi tystiolaeth ddefnyddiol o effaith gadarnhaol llais y dysgwr, strategaethau metawybyddol a dulliau dysgu wedi’u personoli ar agweddau dysgwyr tuag at yr ysgol a’u hymgysylltiad â’u dysgu eu hunain.  Mae cwricwlwm SHINE yn dathlu cyflawniad disgyblion a chynnydd o bob man cychwyn, yn ogystal â’u cyrhaeddiad.  Mae dadansoddiad yr ysgol o arsylwadau gwersi yn dangos tuedd o welliant o un flwyddyn i’r llall o ran ansawdd yr addysgu a dysgu er 2016.

Sut ydych chi wedi mynd ati i rannu eich arfer dda?

Mae Ysgol Glan Usk yn ddarparwr hyfforddiant ar gyfer consortiwm rhanbarthol GCA a, thros y blynyddoedd, mae wedi darparu nifer o weithdai â ffocws ar y cwricwlwm a metawybyddiaeth.  Mae’r ysgol wedi cynnal digwyddiadau i rannu’r cwricwlwm â nifer sylweddol o weithwyr proffesiynol ledled y consortiwm a Chymru.

Math o Adnodd Gwella: Arfer effeithiol

Rhannu'r dudalen hon
 

Cyd-destun a chefndir i’r arfer

Mae ein gweledigaeth o wasanaethu pob disgybl a sicrhau fod pob un yn cyrraedd ei lawn botensial yn greiddiol i’n gwaith.   Dros amser, rydym wedi buddsoddi llawer o amser ac adnoddau i sicrhau fod ein staff yn meithrin awyrgylch weithgar, barchus a chynhyrchiol mewn gwersi ac yn cynnig anogaeth a chefnogaeth bwrpasol i’n disgyblion bob amser.  Mae hyn wedi arwain at sicrhau ymddygiad rhagorol ac agweddau cadarnhaol at ddysgu gan lawer o ddisgyblion. 

Fodd bynnag, yn 2014, daethpwyd i’r penderfyniad fod angen trefniadau ac ymyraethau mwy arbenigol ar gyfer nifer fwyfwy o ddisgyblion oedd yn cyrraedd yr ysgol gydag anawsterau neu’n datblygu problemau emosiynol a chymdeithasol wrth iddynt dyfu.   Mae ein perthynas gydag asiantaethau arbenigol allanol wedi bod yn elfen gref o’n llwyddiant dros y blynyddoedd i gyfeirio disgyblion at wasanaethau penodol.  Penderfynwyd cynyddu prosesau mewnol er mwyn i ni allu bod yn fwy rhagweithiol wrth ddiwallu anghenion cymdeithasol, emosiynol ac ymddygiadol disgyblion a dibynnu llai ar weithdrefnau adweithiol, allanol.  I’r perwyl hwn, sefydlwyd dwy ganolfan fewnol, sef ‘Hafan’ ac ‘Encil’.  Y naill ar gyfer darparu cefnogaeth a’r llall yn galluogi amser adfyfyriol a thawel i ddisgyblion sydd yn methu ymdopi yn y gwersi prif lif o dro i’w gilydd.

Disgrifiad o’r strategaeth neu ddarpariaeth

Mae staff yr Hafan yn rhedeg amryw o gyrsiau arbenigol a phenodol.  Mae’r rhain yn agored i bob disgybl yn yr ysgol.  Bydd cyfeiriadau yn dod gan yr uwch dim arwain, staff, rhieni neu’r Swyddog Cynhwysiad a bydd trafodaethau yn digwydd yn rheolaidd i benderfynu pa ddisgyblion fyddai’n elwa o’r cyrsiau hyn.  Bydd asesiadau yn cael eu gwneud, gan rieni, aelodau o staff ysgol a’r disgybl ei hun.  Mae’r sgoriau o’r asesiadau gwirio yn cael eu dadansoddi ar gyfrifiadur ac mae staff yr Hafan wedyn yn defnyddio’r canlyniadau i greu sesiynau pwrpasol byr sydd yn ffocysu ar agweddau penodol. 

Ymhlith y cyrsiau mwyaf defnyddiol y mae’r canlynol:

Cwrs hunan-barch: Sesiynau grwpiau bach o oddeutu 6 disgybl gan gyd-weithio ar weithgareddau a gemau datblygu hunan barch, hyder a delwedd corfforol gadarnhaol. 

Rheoli pryder: darpariaeth o strategaethau ymdopi mewn sefyllfaoedd pan mae disgyblion yn or-bryderus neu yn poeni am bethau’n aml.

Rheoli Tymer: Sesiynau sydd yn ffocysu ar wahanol strategaethau ac yn gosod gweithgareddau rheoli tymer.

Cymorth Galar: Cwrs i ddisgyblion sydd wedi dioddef profedigaeth lem o fewn y teulu.  

Clwb Cystadweithio: Clwb sy’n cefnogi disgyblion Blwyddyn 7 wrth iddynt ymgartrefu a chymdeithasu ar ddechrau eu gyrfa ysgol

Clwb Cymdeithasol: Rhaglen ar gyfer plant yn eu arddegau sydd yn cael ei defnyddio gyda grwpiau o ddisgyblion sydd yn cyfarfod am un wers yr wythnos i ddatblygu eu sgiliau emosiynol, cyfathrebu a chymdeithasu trwy chwarae amrywiaeth o gemau a gweithgareddau.  Mae rhaglen pellach ar gyfer gwella medrau disgyblion hŷn sydd yn ei chael yn anodd i wneud a chadw ffrindiau.

Rhaglen Llythrennedd Emosiynol: Rhaglen asesiad ac ymyrraeth ar gyfer disgyblion 11-16 oed. Ymysg y pynciau a drafodir mae  hunanymwybyddiaeth, hunan-reolaeth, cymhelliant ac empathi.  Mae gosod nodau a gwaith yn ymwneud â theimladau yn gynwysedig yn y rhaglen.  Mae’r sesiynau hyn yn digwydd ar ôl ysgol yn wythnosol.

Yn ogystal â’r ymyraethau uchod, mae’r Hafan yn ardal llesol a thawel lle gall ddisgyblion ddod i fyfyrio, i ddarllen neu i siarad gyda’i gilydd neu gyda staff ar amseroedd di-gyswllt.  Trefnir sesiynau meddylgarwch buddiol pob wythnos ar gyfer unrhyw ddisgyblion sydd eisiau ymuno. 

Pan fydd disgybl yn methu ag ymdopi mewn gwersi ac yn arddangos ymddygiad amhriodol neu negyddol rhoddir amser iddo fyfyrio yn y ganolfan adnodd Encil.  Wedi cyfnod yn cydweithio gyda staff Hafan ar strategaethau gwella agwedd at ddysgu bydd y disgybl yn ail-ddechrau gwersi prif lif.  Rhoddir cerdyn ‘Adroddiad Hafan’ i’r disgybl er mwyn i athrawon a staff cymorth nodi gweithredoedd cadarnhaol ac ymddygiad priodol.  Adroddiad sy’n cofnodi canmoliaeth yw hwn, nid adroddiad sy’n gorfodi athrawon i nodi ymdrechion gwael.  Gwobrwyir ymdrechion teg disgyblion yn briodol.

Effaith y gwaith ar ddarpariaeth ac ar safonau disgyblion

Mae niferoedd sylweddol o ddisgyblion yn mynychu’r sesiynau cefnogol a restrir uchod.  Mae llawer o ddisgyblion yn rhan o amrywiaeth o glybiau a gweithgareddau allgyrsiol buddiol eraill hefyd.  Mae disgyblion yr ysgol yn dangos balchder yn eu hysgol ac yn werthfawrogol o’r awyrgylch gartrefol, deuluol braf sydd iddi. 

Nid oes gwaharddiad parhaol wedi bod y yr ysgol ers nifer helaeth o flynyddoedd ac nid yw’r ysgol wedi gwahardd yr un disgybl am dymor penodol ers medi 2015.  Mae cyfraddau presenoldeb dros y pedair mlynedd diwethaf yn gryf ac yn cymharu’n ffafriol iawn gyda chyfraddau presenoldeb mewn ysgolion tebyg eraill.  Mae presenoldeb disgyblion sy’n derbyn prydau ysgol am ddim yn dda iawn ac yn gyson uwch na’r hyn a welir yn genedlaethol.   Mae’r canran o absenoldebau cyson a’r nifer o ddisgyblion sy’n absennol yn gyson wedi lleihau’n sylweddol dros amser ac mae gan yr ysgol lefel isel iawn o absenoldebau anawdurdodedig.

Mae arweinwyr a staff yr ysgol yn ymddiried yn llwyr yng ngallu’r disgyblion i ysgwyddo cyfrifoldebau ac ymgymryd â rolau arweiniol.  Mae llawer o ddisgyblion ar draws yr ysgol yn gwneud cyfraniadau gwerthfawr at fywyd a gwaith yr ysgol ac yn frwdfrydig ac aeddfed wrth gyflawni eu dyletswyddau.  Er enghraifft, mae disgyblion hŷn wedi’u hyfforddi i fentora cyfoedion ac i gynorthwyo disgyblion iau gyda darllen.  Mae nifer o ddisgyblion yn arwain ar amrywiol fforymau, megis y Fforwm Eco, y Fforwm Cymraeg a’r Fforwm Byw’n Iach.

O ganlyniad i ddarparu ymyraethau pwrpasol a rhoi cyfleon gwerthfawr i’n disgyblion, maent yn meddu ar fedrau cymdeithasol cryf sydd yn eu galluogi i datblygu’n ddinasyddion parchus ac annibynnol.

Math o Adnodd Gwella: Arfer effeithiol

Rhannu'r dudalen hon
 

Cyd-destun a chefndir yr arfer effeithiol neu arloesol

Ffactor pwysig a sbardunodd newid yn Nhafarn Ysbyty oedd rhyddhau adroddiad Dyfodol Llwyddiannus, a gyhoeddwyd ar ddechrau 2015.  Trwy brosesau arfarnol, roedd y tîm arweinyddiaeth eisoes wedi nodi bod angen gwelliannau sylweddol mewn darpariaeth er mwyn cyflawni gofynion statudol y Cwricwlwm Newydd i Gymru yn hyderus.  

Amlinellwyd proses gynllunio a strategaeth datblygiad proffesiynol amgen ar gyfer staff, a fyddai’n cynorthwyo athrawon i lunio cwricwlwm medrau ysgogol a oedd yn cyd-fynd â modelau arfer orau yng Nghymru.

Aeth yr ysgol yn ei blaen i greu cwricwlwm cyfoethog a throchi yn seiliedig ar fedrau yng nghyfnod allweddol 2, sy’n gofyn i athrawon fod yn greadigol, ac olrhain a rheoli’r ymdriniaeth o ran medrau yn eu cynllunio.  Mae hefyd yn gofyn i arweinwyr fod yn ymddiriedus, yn gefnogol ac yn werthfawrogol o gymhlethdod tasgau o’r fath.  Mae’r ysgol yn credu nad prosiect tymor byr yw cyflawni safonau cyson uchel ar draws cyfnod allweddol cyfan; yn hytrach, mae’n gynnyrch ymrwymiad tymor hwy i athroniaeth arwain sy’n nodi athrawon fel dysgwyr.

Mae’r weledigaeth yn yr ysgol yn ymwneud â chynorthwyo a grymuso athrawon.  Mae’r ysgol yn credu bod safonau cyson uchel yn cael eu hwyluso gan ymarferwyr brwdfrydig, cymhellol a chreadigol sy’n cael pob cyfle i ffynnu.  Mae arweinwyr yn canolbwyntio ar gynorthwyo a datblygu staff i gynllunio a mireinio dilyniannau o weithgareddau dysgu diddorol, ac ymestyn dysgwyr, gan ganolbwyntio ar themâu difyr a chyd-destunau ystyrlon.  

Disgrifiad o natur y strategaeth neu’r gweithgaredd

Roedd angen prosesau myfyriol, annibynnol a chydweithredol i gynllunio a rheoli cyfuno medrau trwy dasgau thematig diddorol.  I ddarparu darlun amser gwirioneddol o gwmpasu’r cwricwlwm ar draws cyfnod allweddol 2, mae arweinwyr ac athrawon yn defnyddio system rheoli medrau ac olrhain amrediad, y gellir ei defnyddio trwy Hwb, at yr holl ddibenion trawsgwricwlaidd a phynciau penodol.  Galluogodd y system hon i nifer o awduron gofnodi gwybodaeth am ba fedr yr oeddent wedi’i gwmpasu ym mhob uned waith.  Dros gyfnod, galluogodd hyn staff ac arweinwyr i weld beth oedd yn cael ei gwmpasu, ac i ba raddau mewn grwpiau blwyddyn penodol ac ar draws y cyfnod allweddol.  O ganlyniad, mae hyn yn cynorthwyo athrawon i nodi unrhyw fedrau neu feysydd y mae angen eu datblygu ymhellach, gan hwyluso cynllunio gweithgareddau dysgu yn y dyfodol yn effeithiol.

Er mwyn creu cwricwlwm yn seiliedig ar fedrau, darparwyd sesiynau hyfforddi ac amser i staff gydweithio.  Y man cychwyn ar gyfer cynllunio gweithgareddau dysgu newydd sy’n gyfoethog o ran medrau oedd dewis testun cymhellol o dan thema drosfwaol gyffredinol, er enghraifft Alan Turing yn datrys cod Enigma o dan faner thema’r Ail Ryfel Byd.  Byddai staff yn cael eu hannog i ymchwilio i destun a meddwl am beth fydden nhw wedi ei weld yn ddiddorol os nhw oedd y disgybl yn astudio hwn am y tro cyntaf, er enghraifft yn yr achos hwn, hanes Alan Turing, ei beiriant athrylithgar, Enigma, i ddatrys codau, a’r anghyfiawnder personol a ddioddefodd.  Ar ôl disgrifio’r cam dysgu, rhoddir amser i staff ystyried y modd y gellir hwyluso ystod y medrau o bynciau ar draws y cwricwlwm mewn dilyniant ystyrlon o wersi.

Gallai enghraifft o ddilyniant trawsgwricwlaidd o wersi yn yr achos hwn gynnwys: addysgu algebra, wedyn gweithio’r rheolau cysylltiedig mewn gweithgareddau datrys codau yn gysylltiedig â thestun yr Ail Ryfel Byd, sy’n datblygu medrau darllen a rhesymu disgyblion.  Wedyn, gellid rhannu’r codau hyn a ddatryswyd gan ddefnyddio gweithgareddau llafaredd, drama neu ysgrifennu a’u gwella ymhellach gan ddefnyddio TGCh.  Byddai hefyd yn hawdd ymgorffori hanes, daearyddiaeth a datblygiad personol a chymdeithasol yn nilyniant y gwersi. 

Mae’r ysgol yn credu ei bod yn bwysig osgoi gorfodi medrau mewn tasgau yn ddisylwedd pan nad ydynt yn ychwanegu at y tasgau.  Mae dewis themâu difyr, gyda manylder a chwmpas, yn rhoi digon o le i athrawon greu tasgau trawsgwricwlaidd difyr.  Y ffordd fwyaf effeithiol o gyflawni hyn yw pan gaiff athrawon eu dysgu i feddwl yn fwy creadigol a theimlo y gallant fentro.  Er mwyn creu diwylliant o arloesedd ac arbrofi, cynhaliwyd fforymau rheolaidd a sesiynau hyfforddi pwrpasol ar gyfer staff, ar sail asesiad o anghenion.  Cryfhaodd y digwyddiadau hyn y ffocws ar safonau ac addysgeg.  Arweiniodd hyn at ddull cyson gan athrawon wrth ddefnyddio rhai strategaethau ac adnoddau. 

Trwy nodi setiau medrau athrawon, a’u clustnodi i addysgu’r un grŵp blwyddyn am nifer o flynyddoedd, rhoddwyd sefydlogrwydd i’r tîm a chaniatáu ar gyfer mireinio a gwella darpariaeth ac arfer yn raddol.  Roedd yr hyder a’r tawelwch meddwl a roddodd hyn i staff yn gymhelliant pwerus dros fuddsoddi amser, egni a chreadigrwydd ar gyfer y tymor hir: gan arwain at lai o faich gwaith yn y dyfodol, safonau uwch mewn addysgu a phrofiadau dysgu, a mwy o hyder ac arbenigedd wrth iddynt gyflwyno eu gwersi yn effeithiol.

Dechreuwyd prosesau hyfforddi a mentora sy’n helpu staff i rannu a datblygu eu harbenigedd â’i gilydd.  Symudodd y ffocws oddi wrth graffu a chystadleuaeth, tuag at gymorth a thwf, gan alluogi mwy o ymddiriedaeth ac arferion gweithio agosach rhwng y staff.

Beth fu effaith y gwaith hwn ar ddarpariaeth a safonau dysgwyr?

Mae’r disgyblion wedi elwa ar brofiadau dysgu difyr a chyffrous sydd wedi’u strwythuro’n dda a’u llunio’n ystyriol i fireinio a datblygu ystod eang o fedrau trawsgwricwlaidd mewn cyd-destunau ystyrlon.

Nodwyd effaith hyn trwy astudio holiaduron disgyblion a theithiau dysgu, a thrwy arsylwi gwelliannau yn neilliannau disgyblion.  Mae safonau gwaith yn llyfrau ac e-bortffolios disgyblion wedi cael eu monitro gan y tîm arweinyddiaeth dros gyfnod trwy arferion craffu a hunanarfarnu, ac mae’r ysgol yn ystyried y gwelwyd gwelliannau nodedig mewn cysondeb ac ansawdd.

Sut ydych chi wedi rhannu eich arfer dda?

  • trwy arolygon thematig Estyn: ‘Teithiau Gwella Ysgolion Cynradd’ a chynhadledd yn Stadiwm Principality

  • prosiect Ysgolion Dysgu Proffesiynol consortiwm ERW

  • ymweliadau dysgu gan ysgolion ledled Sir Benfro a Sir Gaerfyrddin